Wilson's AE110

2007-11-04T03:43:00.000+08:00

搬遷啟示
http://hk.myblog.yahoo.com/wilson-sophia
2年前部車轉色翻噴,需時差不多3個月,期間由於太悶,所以學人開咗個blog寫吓嘢,其實主要係寫部車,間唔中寫吓Bobby,又或者無聊嘢,嘩!原來唔覺唔覺長長短短都寫咗80多篇文章,hit rate都差d到40000,響呢度都識咗好多朋友,雖然有好多至今都未有機會見面,但係都好多謝大家俾面支持keep住睇!
近呢幾個月小弟「暫停」咗寫係因為忙於籌備人生大事,而家搞掂晒終於有時間再寫,不過呢個blogspot server就真係麻麻,出相擺位次次都走位,校到嘔血都差少少,近排佢upgrade咗個interface改善咗,但係舊文章d相又打晒風,如果要逐編執,不如搬去第二個地方好過,起碼yahoo可以玩分類,唔洗咁亂!不過要張所有舊文搬走都幾煩,太多了,最慘係要upload相係好費時,唯有慢慢來啦!最緊要係大家繼續睇我九嗡!新屋見啦!各位!

http://hk.myblog.yahoo.com/wilson-sophia

2007-05-12T04:21:00.000+08:00

遲來了的Trestor Advantage迫力皮1500km測試報告
前排進行咗一個制動系統修復計劃，由於連工包料所費不菲，所以响用料上都要張就一吓，放棄咗用正廠或者Racing料，退而求其次用一D平價嘅什廠料(OEM)，可能大家會質疑OEM料嘅品質同可靠性，與生命攸關嘅制動系統唔應該混為一談，其實而家有好多OEM料都係大廠掣造，品質都有一定嘅保證，而售價往往比正廠或者Racing料平一半以上，絕對係值得考慮！日本Mountain生產嘅OEM迫力碟絕對係好嘢，對於日常駕駛或間中快車都表現得卓卓有餘，VRM迫碟力$560一套我諗唔到有乜理由唔買佢，我唔多介紹。今次集中報告最影嚮制動效能嘅迫力皮--- Trestor Advantage。零件舖老闆話佢係OEM廠出嘅Racing皮，工作溫度係0-400oC，今次會同我之前用開嘅Project mu HD series 0-400oC比較，我會分幾個items去評分，10分為滿分, 假設HD所有分數為5分 (即大過5分就比HD較好, 低過5分就比HD較差)
紅皮---Project mu HD series
藍皮--- Trestor Advantage
測試前言：
响呢個報告入面，小弟嘅評價都係「响主觀上盡量客觀」，尤其係「高溫穩定性」呢一項，由於部車嘅setting如輪胎尺吋，Brake碟都有唔同，而且試車風格亦唔同(紅皮重Brake VS 藍皮中腳拖Brake)，會有好大干擾！加上更換藍皮時我係連卡鉗大修一拚進行，所以响掣動效能同掣動感覺都會有好大偏差！其實我都係想提高到約干溫度再去試Brake皮嘅反應！用温度槍係希望有一D實質嘅數據去支持一下，所以咁樣比較只係一個參考，唔好咁認真，而且有大部份都係我自己嘅個人感覺！由於小弟之前已用過2套紅皮，夾埋約6年90000km，所以小弟對呢套皮嘅表現都甚為熟識深刻。藍皮方面我就用500km去開新碟新皮，再用1000km日常駕駛捉摸藍皮嘅特性。

評分：
1) 低溫制動力=6分--- 講緊係未warm up嘅時候，例如剛著車响停車場或者啱啱出車果陣嘅制動力，當然喉呢段時間好少會快車重Brake，反而注重低溫之下拖Brake有冇「chok吓chok吓」，藍皮同紅皮其實分別唔大，紅皮响低溫時有少少窒嘅現象，藍皮就幾線性，呢項藍皮好DD！

2)高溫穩定性=2.5分--- 先講紅皮，新皮嘅時侯都好刻以去大腳試，果陣用緊9成9新嘅205/40/17 Goodyear LS2000胎+冇坑碟，大霧山重腳late brake乜都齊(果陣仲係年少氣盛)，停咗車用溫度槍度出嚟係213oC，但係紅皮仍然幾有反應，唔會太腳軟，之後換咗全新195/55/15Yokohama AVS Sport胎+開坑碟玩到變紫色，但係都冇問題，要留意如果停車度200oC，掣動時可能已超過350oC以上，紅皮高温時都維持到穩定性！！藍皮方面就勉強少少，認真地試過一轉大霧山錦田段，均速以80-90km/hr落山由於套胎唔係咁咬地(4成新195/55/15Yokohama AVS Sport+全新冇坑碟)，所以冇刻意late brake，反而用中腳同埋長時間少少去拖Brake，希望藉此提高溫度，約8-10次中腳長時間Brake後，高溫下嘅藍皮明顯地腳軟，反應約下降咗約20-30%，制動距離拉長咗令你未必太有信心去late brake，而較為可怕嘅係從車外傳來大陣燒皮味，而停車後前制動部份更出白煙！可能係到達咗皮嘅極限温度，停咗車用溫度槍度出嚟係173oC(估計制動緊嘅時候應該有350oC以上)，推斷藍皮極限温度未必有400oC咁高，可能响一D好激走嘅場合會有好明顯嘅腳軟現象，藍皮用黎「博命」就唔會夠用！呢一點大家要考慮一吓！

3)拖Brake制動線性=5分--- 日常市區駕駛都唔會大腳Brake, 最常用反而係拖Brake埋燈位、讓路口或塞車等等，講緊嘅係掣動系统已warm up約60-80oC揸手進行拖Brake，線性嘅制動力除咗令駕駛者容易操控外，車上乘客都唔洗用嘔吐袋！呢方面藍皮真係唔錯，要用字眼去形用可以用個「柔」字，線性得好「平易近人」，唔會有「chok吓chok吓」嘅現象，行街感覺優悅(有可能同大修卡鉗有關！！)，同紅皮平分秋色！

4)突然制動=5分--- 响變化多端嘅道路環境下，往往有危險發生，突然制動反應其實好重要，停唔切固然會撞車，但反應過敏亦會令輪胎超出極限而有失控現象，而要留意一般市區駕駛Brake皮未必處於極高溫狀態，停咗車用溫度槍度約50-60oC，估計行車時一般約60-100oC。有一次响Highway行緊100km/hr，前面平路轉落斜位塞車好遲先睇到，由於慢線D車塞停晒，所以我大約數住，3/4腳Brake約6-7部車位收停部車，套4成新AVS Sport叫咗一叫，整個過程清脆利落，而且好有線性，唔會容易鎖胎(著ABS)，呢方面藍皮俾到我一個驚喜！表現同紅皮相約！ 5)清潔度=3分--- 老實講，藍皮响清潔度方面都令我幾失望，之前用紅皮同開坑碟，平均行300km都只係有少少粉，500km先叫污糟要洗軨；但呢套藍皮用普通碟行200km已經好污糟，印象中同以前用過嘅Endless NA-Y差唔多，而家用白色軨就好煩，成日要洗！所以呢項比紅皮差！我影咗3張相去比大家觀察一吓清潔度分別係0km, 200km & 500km。

6)噪音=5分--- 有好多Racing皮會發出擾人嘅「支支聲」，好克人憎，藍皮好靜，絕對冇「支支聲」，呢放面紅皮表現都好好，呢項打個和！

7)耐用度=?分--- 藍皮1500km測試報告當然未有comment，咁不如講吓紅皮，最先係用正廠冇坑碟，新皮行約60000km玩完(剩番1-1.5mm)，之後用Mountain土炮開坑碟(每面6條直坑)，新皮行約30000km玩完(剩番1-1.5mm)，紅皮其實都算好耐用！值得一提係红皮行到隻碟好「令」，隻碟成日都好似好新咁，而且唔算食碟，30000km都只係食咗0.8mm碟左右，好正！

總評：
以而家年紀老邁嘅駕駛風格，加上用咗白色軨，我反而重視噪音、拖Brake制動線性同清潔度呢三項，藍皮表現都算合格，而且只售$320, 紅皮售$650，一半嘅價錢照理應該只有一半享受，耐用度冇評分唔計，紅皮=30分 (5x6) 藍皮=26.5分(6+2.5+5+5+3+5)成，一半價錢9成享受，如果唔係用來「死過」，行街或快少少，藍皮絕對夠用，所以絕對抵買！可能大家會問我點解用咗唔夠2000km就換GTO 4pot？？無他，純緒貪靚----變態！

2007-05-09T11:54:00.000+08:00

補油一問
真皮軚環邊位磨損，用乜油補番？洗唔洗上力架？

Thanks

2007-05-07T23:56:00.000+08:00

強化！

浮動碟係由中心部份嘅銻冚鐘&外邊金钃碟框組合成，兩者係靠若干粒螺絲連接住，所以D螺絲係擔當住重要角飾，其剛性重要之餘，不斷溫度變化嘅熱漲冷縮效應，亦會令螺絲容易「番鬆」！早排落去新填地街搵到間工業螺絲舖，佢地話要剛性強嘅螺絲莫過於拉力鋼造，即係黑色果D，最大問題係見水氣會生銹，影嚮外觀之餘日久生銹侵蝕都唔係咁好；其次係不銹鋼造，雖然剛性冇咁強，但係都夠用，而且生銹機會好低(唔係完全冇！)。其實以我果套浮動碟來講，每隻係由12粒不銹鋼連接住，本來都夠(以我自己經驗估計)，不過Brake並唔係「講玩笑、鬧著玩」，所以都要正視！雖然我最後都係買番不銹鋼螺絲，但係我就買隻長5mm再配埋絲帽用來做「迫帽」，再加埋loctite導絕「番鬆」機會！雖然隻碟會加重咗少少，不過穩陣少少。裝拆過程唔算難，發現咗本身嘅螺絲都有用loctite較為緊少少，其實落咗loctite日後都好難拆番，不過就算第時隻碟到期要換，我都會連埋冚鐘成個換！

2007-05-06T09:10:00.000+08:00

平嘢有好；虛不受補！

早3個月在右換咗Valvoline偈油&波箱油，開頭都覺得好爽好正，點知近呢幾日發覺3波上4波或5波落4波唔太順暢，有少少 'kick'住「彈手」，而且一去4波就「拍」一聲，有D似掃同索牙嘅初期先兆……不過熱咗車又好番少少，心諗：「唔係咁邪同索牙到期嘛？」，因為我呢個波箱都有成8歲 and 10萬公里以上，而且3、4波同索牙係AE車6速嘅弱點，係較為易死嘅一環。換個第二個二手又冇乜信心，而且二手6速波箱個價好海鮮，$3000-6000不等，連人工各樣，$5000冇走雞；大修波箱換晒同索牙, Bearing料唔貴，但人工起碼$3000，工料前後又係$5000冇走雞！打得開個波箱大修，落埋LSD同新Clutch就肯定o架啦，$8000-9000埋單……夢又發完，醒醒先唔該！咨詢過newsgroup嘅專家嘅意見，新換油咁快有問題可能係隻油唔夾個波箱，而且近排天氣熱咗都有影嚮，以前以為波箱油要求好低冇所謂，我又冇LSD，用花生油都得啦，唉！上次仲落本D買隻貴少少嘅Valvoline金樽油諗住比D好嘢佢食，點知虛不受補！！同博士(我諗好多人都識佢)傾開，佢部RS200 / 6MT都試過同樣情況，換咗好多貴油Speedmaster、Redline都唔得，反而死死地氣用番Toyota正廠棍波油即刻冇事，而且仲要平一截！老實講玩咗Toyota十幾年都唔Q知佢有出棍波油，反而自動波油就知道同街係，孤陋寡聞，瘀皮到爆！去咗TRD Shop度入咗3L，共$240，真係平到笑！前晚自己爬車底DIY，好彩有飛機積有櫈仔，都唔算難，換完之後凍車熱車都順番晒！希望係長久形啦！估唔到平嘢有好！不過上次Valvoline仲有1.5L剩咗係到，唉！可能要用黎炒餸！^%$^@$!@#$%^..... :P

2007-04-13T23:35:00.000+08:00

准我蔡一志------三菱@豐田！！
嘩！出咗上一個post之後引黎好大迴响！MSN、電話、Email接唔少！有D問點解用假呀？不文不類、唔裝好過裝，再唔拆走就幫我拆……..洗唔洗咁激？但係又有D就話好正，問响邊度買？15”軨裝唔裝到？好似真嘅一樣……etc，喂！梗係似真啦，因為根本係真嘅！！！其實細心少少睇清楚我連碟都換埋就知啦，之前只係無聊同大家吹吓水，唔好見怪！哈哈……！好！講番正題！

之前見過有人搭橋改Mazda RX7(FD)嘅4pot鮑魚，隻鮑魚好細隻，15”軨都裝到，而且聽講都幾好收，但係我個人就覺得鮑魚個款唔多靚，而且我check過Mazda廠皮都要成$7xx，Racing皮選擇亦唔多，Rebuild kit亦係超難尋，所以未必係好選擇。

可能同三菱廠有緣，所以再一次三菱@豐田，流用Mitsubitshi 3000GT (GTO)編號Z16A嘅4pot鮑魚，係日本Sumitomo製造，係幫好多車廠生產Brake嘅零件廠。我都係响car8搵嘅，大部份都係老錦嘅劏房，我就揀咗套最新嘅，貪佢套皮夠厚(8-9成新)，而且係藍皮 (雖然唔知係乜牌子) ，仲用風槍試過所有遮都冇積死，塵com亦未見有損傷，唔要碟價錢仲減到幾平！改裝工序方面都算簡單，鮑魚腳位要cut走一忽，再開過窿，Mitsubitshi個字要磨走再噴上紅色，當然要度位車條橋啦。重量方面都幾好嘢，用手執起GTO鮑魚連橋比VRM鮑魚連架明顯輕(VRM出名重)！

碟方面就用分離式浮動碟(俗稱「銻陷鐘」)，「銻陷鐘」用上7075銻合金製成，好處係輕而堅韌，而且散熱快同埋衰減震動，外面電上一層藍色只係想美化作用，中間部份厚度為10mmVRM=6mm)，因此10mmSpacer要車薄4mm(即Spacer=6mm厚)去底銷橫跨距變化，唔落Spacer唔得，鮑魚會hi到條軨，以我套RP-02 (7JJ 35mm offset)為例，起碼要3mm厚Spacer先可以避到，如果7JJ 40mm offset仲要落8mm Spacer……如類推，仲要視乎D爪有冇向外弧！碟外框係用德國製嘅Balo Motorex碟改造，張中間部份車走、鑽窿同開牙，直徑295mm，其實16”軨係可以用300mm碟，不過驚日後換軨未必隻隻都裝到，細5mm穩陣D；厚度係30mm，最小為28.4mm；VRM厚度係24mm，最小為22.4mm。由於唔想太食皮同有雜聲，套碟都冇開坑。雖然行「銻陷鐘」，但始終比VRM直徑大30mm，厚咗6mm，重量方面都佔唔到乜便宜。暫時對果D組合縲絲唔太滿意，遲D會換番強化拉力縲絲！

掣動力方面同都未有認真試激走，我想响日常駕駛先熟習吓，之前由原裝單遮上VRM孖遮，初時泊車時都會有chok吓chok吓要過一排先習慣，但今次由VRM孖遮上GTO 4遮又冇咁嘅問題！高速拖Brake都幾線性，之前有好多人話4遮掂少少就鎖胎，又唔係咁恐佈，睇過D幾pro嘅汽車website，如果其他因素冇變(如皮&碟size, 物料, 車重……etc)，鮑魚遮嘅直徑越細而數目越多係令皮嘅壓力更平均，制動極限更高而更線性；相反單一個大單遮嘅鮑魚會冇咁線性，係有條formula計出黎，不過太深我唔係太識！不過呢D好講個人喜好，因為有好多人都鍾意較直接嘅掣動表現，响激走時超late brake去控掣重心轉移，當中以Honda嘅17/15大單遮鮑魚為表表姐，即使係DC2R等強勁車種都可以應付有餘！以前我坐過一個friend部DC2R，佢真係夠膽130kph一腳大brake即放100kph就劈入D直角街坊灣，佢話就係一腳大brake車頭一沉頭胎最咬果一刻扭軚就可以做到，我當然明佢講乜，不過我唔敢/唔識做出黎……對於我黎講，我係貪呢套4pot夠靚, that's all！！

2007-04-11T11:50:00.000+08:00

睇得唔打得---假狗鮑魚殼
無聊冇嘢做，大前排有日經開土瓜環某精品檔，見到有樣「幾得意嘅玩意」，就係「假狗鮑魚殼」，就咁睇其實都幾假因為都幾「膠質」，但係見到有部大霸皇裝咗又幾「像真」，有形有款咁，於是心思思買咗對番嚟裝，老闆話17”軨先裝到，16”軨要磨少少邊避位！幾經辛苦先搣走咗張Brembo貼紙而又冇整花個膠殼，上下磨咗少少邊，裡面又要執少少先可以fit到落個VRM鮑魚度，都搞咗幾日，再响GP夢咗張Tom’s貼紙，得閒先痴上去，好彩有10mm Spacer條軨先可以避到個膠殼，你地話係咪好正呢？真係唔打得都睇得！！哈……哈……！

2007-04-02T12:03:00.000+08:00

出售:HKS大東菇Kit
HKS Super Airflow大東菇Kit, 外徑200mm，喉咀內徑70mm，跟大變細軟膠Adaptor(70-65mm)、65mm有sensor位風pipe、不銹鋼喉cool、原裝撐臂(固定東菇用)，9成新，售$450，合AE(全fit位)或其他車系(要改位)，因買多咗隻, 所以出售！

2007-04-01T04:14:00.000+08:00

猜拿製造HID
HID呢樣玩意其實唔算新嘢，由好多年前菲利普推出，當時要成五千個大洋一套，約3年前我就用$1500買咗對二手TRD HID 火牛，再用$1000買咗對全新名科6500K H4膽俾大燈用，用咗大半年有一隻燒咗，保養期內換咗一對，之後用到而家都好正常！由於偉大祖國嘅「拷貝神功」張呢種高科技「大眾化」咗，而家唔洗一千個大洋都有交易！前排有個「馬交fan屎」上開廣州，幫我買咗套番黎，IKDO日歐光電，雖然呢隻牌子聽都未聽過，但係勝在夠平---HK$560一套有一對牛連膽，仲有線材同Relay，真係超值！而且呢隻IKDO亦有HID基本要求---就係成套掉入水都唔會壞！！雖然冇保養，但係「馬交fan屎」話之前裝咗上隻戰羊成年都冇問題，而且五舊油玩吓無妨！！今次選擇咗超黃光3000K H3膽俾霧燈用。平價HID令人擔心嘅地方，就係安全性問題，傳聞有好多火燒車嘅原因，係HID因短路或過熱而著火，當然產品質素係關鍵，但係安裝手法都好大影響，市面有好多車房收一百幾十裝工，手法真係幾馬虎，電線就咁cut咗駁番用電線膠布包住，隻牛用雙面膠布痴住放响引擎旁邊就算，其實呢D都會間接影響HID耐用及安全性！HID火牛工作時本身都會發熱，約40oC左右，而且唔好太震盪，所以最好放响較涼而且有少少防震嘅嘅位置，有少量沾水係冇所謂！駁線就一定要上錫同用熱縮膠包好，駁口絕不可有沾水短路嘅可能，咁樣就安全好多！

我自己就好注重安全多於其他，所以今次我都搞咗3晚先裝到套HID，其中最難搞係隻牛嘅安放位置同要改燈膽去個霧燈穀入面。先講講接駁火牛電源線，由於我有多套後備霧燈，一切都易搞好多，為咗令防水性進一步提升，我直頭爆散咗原裝個霧燈插，條線焊落支pin度，再落番個防水膠圈，然後再裝番個燈插，咁樣做日後我可以好容易還原番原裝膽！牛方面我貼咗3層「燕梳神」做防震，用索帶固定咗响陣咀旁邊，都好扎實！燈膽方面就煩D，要用响個霧燈蓋開個大窿走線，再用玻璃膠封番，然後先可以裝入燈穀！最後用Grade A & B 嘅溫度貼睇住隻火牛同燈穀，咁就萬無一失，而家暫時每2-3晚就check吓D溫度貼有冇異常溫度，過一排穩定咗就每次換機油先check一次！

隻燈嘅效果都算ok，比我之前用嘅Super Yellow Halogen膽黄好多同光好多，燈影都集中响車前2-3米，唯一有個少缺點係當引擎關掉而死火燈閃緊時候，HID會光吓暗吓咁樣，不過有幾何關掉引擎著霧燈吖！哈哈……！！即本放長雙眼睇吓呢套「猜拿製造HID」可以玩到幾耐！！
最後唔該晒Jacky君呢位「馬交fan屎」介紹呢套好嘢比我！！

2007-02-26T04:26:00.000+08:00

老危！！！
今日於旺角勝利道响好短時間内見到2單老危事件！真係想係呢度同大家分享一吓！最先係有部舊款Mazda 323 Astina，個死氣尾鼓同個尾喉咀已經完完全全咁斷開咗！！！佢應該係有2個吊碼仲吊住，搞到行車時個尾喉咀自己搖吓搖吓，尾鼓就自己彈吓彈吓，仲差少少跌出來拖住地咁行，我咁啱仲跟佢尾……睇唔過眼所以影低佢！轉出大街後我即刻入第二條線避咗佢！老實講，條喉都斷咗仲要彈吓彈吓，行車時都肯定「Ping Ling Pong Long」咁聲，有乜理由仲周街行咁老危o架？又試諗吓行行吓成個尾鼓跌咗出來，後面部車就算有什麽安全車速或安全距離都冇用，肯定硬食！唉！本來我都想通知該名車主，不過自己又揸住部車，冇計！又或者佢正去緊車房維修途中啦！唉……算啦！如果邊個認得呢部車，就真係通知吓個車主啦，免得累街坊！！跟住又見到部拖車拖住部抄咗份頭嘅CD Accord，仲堅，部Accord車尾竟然大無私樣咁坐住個乘客，我記得法例係唔容許被拖住嘅壞車上載客，因為好耐之前我都試過咁嘅情况，個拖車哥哥話咁樣係唔得嘅！又啱嘅，倒轉諗如果拖車個架有乜東瓜豆腐，被拖嘅車甩咗出來，我諗作為車上嘅乘客就只有等……你都咪話唔驚！雖然機會係好低，但係意外嘅嘢就係咁！

2007-02-22T13:12:00.000+08:00

幾好機器舖
自己部車有好嘢都係DIY，裝裝拆拆，加加減減，咁當然有好多嘢靠自己就唔得啦，因為根本冇咁嘅工具同器材，尤其係零件上嘅加工或者打磨，例如係光碟，造Spacer、加大蝴蝶瓣……等工序，即使係車房都只係將零件送去機器舖進行加工，選擇機器舖，手工同準確固然重要，其次最好係一向有做開汽車零件果D，咁樣溝通起來會容易D唔會雞同鴨講！我自己就幫襯開一間响紅磡區嘅，其實我n年前已經係幫襯佢，呢間嘢排面雖然幾「Up Dup」，但係個師傅都幾有料到，手工好又快手，而且收費仲好平吓！光碟一對四面=$130，VRM碟改細4孔加中心圈=$300(人工包中心圈料)，Spacer 連中心圈一對=$ 400-600(視乎厚度)……etc，另外佢仲有燒焊(電焊/風煤/瓦絲/銻焊)服務，而且仲有翻新軨服務，好多鄰近嘅車房或胎軨舖都係比佢搞！我見有D軨直頭蹦咗1/4隻，佢都係燒焊再車番靚，有D好嚴重都搞到，服到我五體投地 (所以我都唔敢再買2手軨) ！！！不過佢嘅缺點係不設裝拆服務，即係話光碟你要成套碟攞去，加大蝴蝶瓣要自己裝拆，佢唔會幫你搞！有需要大家不妨找找佢，不過千其唔好撻我朶，因為個師傅只係認得我個樣，佢唔知我個名&唔認得我部車！哈……！！

2007-02-17T14:55:00.000+08:00

AE & Bobby
Bobby咳咗幾日，早幾朝帶咗佢去睇醫生，由於太早，所以帶咗佢去西九長廊行咗一陣，佢老lu, 行都行唔穩陣，手震震咁，其實佢都成17歲，人地話狗嘅1年等如人嘅7年，咁計番數佢都過百歲，17年入面其實都唔經唔覺，我都當咗佢好似親細佬咁(雖然佢大過我)！以前細細個，佢好鍾意一落車就幫我洗吓條軨，而家佢聞吓就算！唉！呢幾個月佢都枕住咳，食葯就冇嘢，食完葯過幾日又發作，有陳時咳到瞓唔到，好慘！今次醫生話Bobby個肺有D水聲，可能個肺開始退化積水，要長期服葯，知道咗我個心都有少少up，要珍借多D同佢一齊嘅時間，食葯之後Bobby即刻冇咳，不過可能今次多咗D葯，Bobby佢好似冇乜胃口，連佢最鍾意嘅零食同雞肉都唔大想食，今日仲肚苛同嘔，我真係好擔心。部車壞咗，俾錢可以解決，但係生命就……可能大家會覺得我懶感性，但係當你身處其中嘅時候先體會到！而家一好天我就放佢落街行吓，影多D相留念，唉！講到好似……嗚嗚….！珍惜身邊嘅人同物啦！

2007-02-17T03:43:00.000+08:00

大換血
呢排部車「笠」晒，而且副偈D聲好「燥」，聲大大又唔快，原來偈油行咗成7000km，唔怪得啦！前排買齊晒D偈油&波箱油，一直都懶得換，自已試過換波箱油，但係粒入油縲絲緊到死我拆極都鬆唔到……%&$%&^*@......，終於都係去咗俾車房換，換完之後爽晒！好奇怪，換出來D偈油正常地黑，但係D波箱油行咗20000km都係透明金黃色好鬼乾淨，不過見行咗年幾，換都正常！6速波箱可能多D齒輪，所以裡面空間細咗，2.5L油都唔夠就搞掂，等我仲買咗4L油！又講吓呢間車房，可能有好多車友都幫襯過，葵興嘅合眾佳信汽車用品有限公司，呢間舖頭我識咗好多年，都算好老實，你問我佢係唔係最平？我只可以答：「D嘢又唔貴」，不過就跟到好足同好細心，而家好少胎舖仲用磅尺去緊軨縲絲，多數都係用風炮狂打緊就算，起碼佢地仲用磅尺，裝拆胎都唔會整花條軨。我上次行17” RP-01劏咗胎，佢都即刻同我班到套Enkei CP-01 & Yokohama AVS Sports番黎，都算係咁！如果大家响附近都可以去幫襯吓，你同老細「阿楊」講話係我介紹，可能會比個靚價你！哈哈！廣告就賣完，係咁先！

合眾佳信汽車用品有限公司
Add: 葵涌光輝圍 45 號萬成樓地下 4 號舖
Tel: 24289193
http://www.goldwillhk.com/front_index.php

2007-02-14T14:06:00.000+08:00

加闊橫跨距
終於都搞好晒！Yeah！！前面落咗長縲絲，再加10mm 中心圈spacer，基本上前面條胎軨「雅」晒出黎，而且係完完全全拍齊沙板！視覺上條軨又好似大條D又靚D而且隻RP-02嘅抓係向外拋加埋Spacer後，第二時改大鲍魚都有大把位。後面一樣加番10mm中心圈spacer，滿載5人時會嚴重hi沙板，車房發現係尾沙板近尾Bumper位置「hi」到條胎(紅圈位)，所以只係將果輪拱頂至Bumper沙板位「碌」斜咗(綠圈位)，而Bumper內格泥擋位cut咗一小忽(藍圈)，試過滿載5人都冇事lu，正！其實車尾加10mm spacer都冇前面咁出，可能係改咗行碟，比行豉薄身少少，不過而家咁樣都好極限，從車尾望去條胎大半邊都凸晒出Bumper好出，加上有少少負Camber，已經有D跨張！算啦！加咗Spacer之後，部車嘅Handling有D怪，有好有唔好，好嘅係轉响極限的確係高咗好多，Highway行住120-130km/hr嘅快彎比以前穩定好多，有D似大房車果種feel，呢個係加闊橫跨距嘅直接得益；不過响D細彎就好似鈍咗少少，尤其係S彎，部車好似冇咁靈活，回頭指响性有D模糊，有D似以前裝205胎嘅感覺，可能响呢個setting上部車偏向under-power，操控同馬力比例太大……冇計，5AFE就係5AFE……

2007-01-30T11:28:00.000+08:00

冚家軨！
嘩！原來數吓數吓，我呢部車都換過7套半軨胎，點解有半套？因為其中一套17吋RP-01我番噴咗一次，所以計多半套！

5Zigen N1R，15X7JJ offset 42，呢套軨好正路，搞到部110有少許 classic feel原裝冇中間個軨Cap，後來响胎鋪搵到個Tom’s軨Cap，當堂醒咗！

講真，講外型我就最鐘意呢套17 X 7JJ offset 40嘅Enkei RP-01，一來17”已經oversize咗，而且RP-01嘅爪伸到軨邊感覺好大，而胎用205/45/17超薄胎就令佢睇起上來大上加大！！真係型！！後來番噴咗金色襯落墨綠色車身真係好正！！不過條胎太薄成鬼日劏胎搞到我怕怕，用咗一年到就放咗……

Enkei CP-02 15X7JJ offset 41，係Enkei舊款之作，有少少Q嘅感覺，Echo仔或者Jazz仔用會幾好睇，4孖柱軨花好簡約，但係軨邊好粗令佢睇起上來好似14”軨，襯落AE度就麻麻地，不過$560一隻好抵之餘，而且磅過只有5.9kg，以咁多年前嘅鑄軨技術都算係輕！

Enkei RP-01 16X7JJ offset 45mm，再嚟一套Enkei RP-01！白色同我而家用緊果套白色RP-02差不多，不過呢套RP-01 offset 45mm完全係唔多掂，條胎軨缩晒入去好似事故車咁，雖然用20mm spacer可以補救，但造spacer價錢仲貴過套軨，非常不值！加上跟軨嘅205/55/16胎雖然有9成新，但係太厚唔啱AE，所以用咗幾日就賣番出去！

Yokohama Advan TC 16X7JJ offset 35mm，又係一套好舊款但罕有嘅軨，廠方公佈16”有7.56kg不過不失，佢中間係有隻「碟」遮住D縲絲 & 一粒「大絲母」收住隻碟，不過我冇裝到！由於呢套軨都係番噴，所以D色都較易甩番，最後都賣咗！

Kosei K1 Racing 15X7JJ offset 35mm，Kosei廠亦有OEM出俾Buddy Club 型號為P1 Racing，同花款6幼柱，有D似DC2R原裝軨，亦係因為裝咗呢套軨，我都接受咗白色軨幾襯我部車，唔該晒阿Joe / 阿B借住套K1俾我用住先！

Enkei RP-02 16X7JJ offset 35mm，而家用緊，唔多講！

2007-01-25T09:09:00.000+08:00

我嘅新影相Blog---Wilson's Shot
成日都講車，講吓第二樣！其實我都幫我部車影咗好多相，成部車影又有，DIY拆到散晒又有，所以DC對我嚟講都係重要，一向我都係用部Panasonic FX7 & FujiFilm S602Z，呢兩部機都幾好用，尤其S602Z 嘅1cm Super marco 對焦，响汽車DIY上大派用場！不過用咗佢地2年，都係時候換機，於是响早2個星期搵到好心人收養咗佢地，反正我都有部K800i電話做SnapShot機，於是把心一橫買部單鏡機玩吓，Canon同Nikon似乎係大熱倒灶，但我就揀咗另一隻冷門嘢---Pentax K100D！點解？响呢度唔多講，我開咗一個新Blog---Wilson's Shot(單鏡新丁)，希望大家多D去捧吓場，指教吓小弟嘅攝影技術，因為單鏡機嚟講我都係一竅不通，條link响sidebar都有架，多多指教！Thank you ！！

2007-01-24T23:29:00.000+08:00

稀客---豐田大力士4X4 & RR Phantom
今日行經葵涌高架段，從倒後鏡見到一架我只可以上網先見到嘅車----Toyota Hilux 4X4！係最新款嚟，流線前衛得嚟又幾tough！其實都知道皇冠車行前排已引入咗香港，不過未有機會見面。今期頭冚有個窿即係有行Turbo或SuperCharger，頭燈有D似Rav4，呢部仲落咗大胎軨更加正，不過呢類4X4 Pickup响香港實用度就少D，要送貨個個都買Van仔，咁樣反而令Hilux鶴立雞群！上一代Hilux 4X4花名「農夫車」，可能係農夫先會用，其實上一代都好賣得，因為各大地盤都會有十幾部，無他嘅，因為部車好Q耐用，响youtube見過條片用部Hilux撞樹、放火燒通頂，再放落海水度成幾粒鐘，再放响大廈天台炸咗楝大廈，响石屎堆度執番部車出嚟，部Engine一樣著到！死未？不過我諗如果咁樣對待部新款Hilux，放落海即死，因為舊款Engine冇乜電子嘢，新款就大把sensor。我用部K800i同佢影咗幾張相，Plan得都唔錯！之後近九龍站見到部Rolls-Royce Phantom，軍綠色幾特別，呢排成日响青嶼幹線見到，聽聞係半島酒店買咗幾部用嚟接客往返機場，真係high！

2007-01-23T14:23:00.000+08:00

(已售)5mm spacer連中心圈
由於對5mm spacer唔啱用(唔夠厚)，所以現在出售，5mm鋁合金Spacer連中心圈，Spacer中心圈內徑為54.10mm，對應Toyota細四窿車種(P.C.D. 100X4)，AE, NZE, NCP……etc，外徑為73.10mm, 大部份台/日制軨均可，只用數日， Spacer連中心圈好處係加裝咗Spacer後都會有個中心圈固定條軨，高速時唔會震。一對售$500

已於17/2/07 成功出售

2007-01-23T14:07:00.000+08:00

驚異offset---25mm平沙板！！！
可能已到咗化境，offset 35mm似乎未合乎到我嘅要求，我都係嫌條RP-02縮咗少少入去未夠出！！於是走咗去機器舖「車」番一對Spacer先，呢對Spacer係專門對應AE車系同埋套RP-02，因為內徑係54.10mm係fit晒盒頭中心圈；而外徑為73.10mm亦fit晒條RP-02嘅內徑！！(其實大部份軨內徑都係73mm或者70mm)有中心圈嘅Spacer好處係加裝咗Spacer後都會有個中心圈固定條軨，高速時唔會震。由於驚會hi沙板，所以保守少少，Spacer厚度設定為5mm，而我响安裝嘅時候再加多隻5mm普通Spacer，即係total 1cm厚，但由於普通Spacer冇中心圈，所以固定條軨嘅作用係冇咗，不過一來尾轆冇乜所謂，二來我都係諗住試吓先，隻普通Spacer可以隨時拆番出嚟，行吓先！咁樣計offset35mm + 10mmspacer = offset 25mm，嘩！加咗1cm Spacer令到尾軨平晒沙板，外觀好正，好有BTCC果總feel，就係我想要果D！！吉車行車絕冇hi沙板，不過坐滿5人嘅時候就hi住行，要去車房碌碌個板先！Handling方面就怪怪地，車尾轉向motion有D鈍，推頭勁咗！應該要响前轆加番1cm Spacer來balance番！得閒先，因為前面盒頭要換埋長縲絲先加到咁厚嘅Spacer！

2007-01-23T13:08:00.000+08:00

Footwork
換咗套K1 Racing之後，可能套AVS Sport有D省胎，搞到有少少走軚(走左)，而且都好耐冇度軚尺，係時候搞搞佢，上機一度走位情況都唔算嚴重，Toe in/out, Cluster最多都係差-2度以下，至於Camber就有-2度以上，可能low低咗會有影嚮，加上前輪用咗camber纙絲，所以就去到-2.4度「八字轆」嘅現象，不過冇波子塔頂，又冇尾波子拉桿，所以Camber值都係得個睇字，冇得校！Toe in/out就校番0.5度以下，修正番之後冇走軚lu，正！！其實之前試過toe in1.5-2度部車轉向會「敏捷」D，有少少over嘅傾向，轉大彎會幾好，而且唔會太省胎，大家下次度軚可以試吓！

2007-01-23T11:59:00.000+08:00

安琪凹皮靈異 & 旭高哈麻遺傳因子-GP
唉！點解要咁玩我？16X7JJ 35-38mm offset 金色軨真係咁難搵？放棄咗金色Manaray Sport Final Speed Gear R之後，本來係諗住整套金色Enkei RP-F1，點知套軨來港後原來係銀色，問Enkei日本廠果邊話金色已停產！！Bang！Bang！Bang！晴天霹靂！！於是呢幾日忙於四處搵軨，其實顏色都係次要，因為日後都仲可以番噴轉色，反而最緊要係offset要35-38mm，因為我唔想隻軨縮晒入沙板好肉酸！所以我都退而求其次要白色軨，因為套白色K1 Racing 15”睇落咗都ok嘅，但係台仔軨offset全部都係40-45mm；而16”日本軨offset 35mm細4窿(PCD 100X4)又冇乜選擇，幾乎只有Work Emotion CR Kai，白色/古銅色要$1600一隻，金色每隻仲要$200，我就真係唔捨得買，加上我又唔係咁鍾意佢個款，所以放棄！另一隻Work Nezart Sport隻款就「薯」D，五粗柱有金色，係15” TRD軨同我對上果套Yokohama Advan TC嘅混合，點知仲貴，$1900一隻……#&%^*#@！比得呢個價，我上17”啦！
最後屎忽撞棍，响觀塘金源搵到套白色Enkei RP-02，16”X7JJ offset 35mm，條件乎乎合我嘅要求，唯一缺點係呢隻RP-02屬於N年前嘅作品，係RP-01嘅後繼款，不過簡單清爽嘅5抓伸到軨邊俾人有大一吋嘅感覺，$900一隻又唔算貴，雖然唔係鍛造，但肯定係made in Japan質素上得到保證，一磅之下係重量係16.25磅(7.4kg)，唔算太輕(16”鍛軨约5.5-6kg)，不過冇所謂，今期玩Outlook！
輪胎係Yokhama DNA GP，即水貨ES100，尺吋亦係My favourite ---195/45/16，性能方面冇乜驚喜，行得到就算，我貪佢薄胎肚size特別！我套新鞋，靚嗎?

後記：觀塘金源竟然有15X7JJ offset 38mm嘅Manaray Sport Final Speed Gear R，金、銀古銅都有，有興趣可以去睇睇！因為15”都幾靚！(紅格內)

2007-01-07T04:26:00.000+08:00

白光藍光
之前對B1 Helogen超白細胆用咗2年，果D藍色coating燶咗搞到燈光變咗黃色，於是換咗去做尾車牌燈，前日响金標緻買咗2粒PIAA嘅超白LED細胆，有2隻：平果隻$148一胆有2粒LED；貴果隻$210一胆有4粒LED超光！！諗住落本少少買隻貴嘢，裝咗落部車度白過頭變咗藍色，情況就等於8000K HID咁偏咗藍！唉！雖然係好光好靚，但係唔想免費驗車，咪搞！於是昨日返去換番隻平嘢，雖然2粒LED冇咁光，不過算啦！俾D相大家比較吓，上面係貴嘢，下面係平嘢！

2007-01-05T08:04:00.000+08:00

金光蓋頂
早幾日得閒DD，自己噴咗個盤頂變金色，雖然唔係咁好睇，但係前一次噴金色鮑魚後用剩D金色油，用埋唔好浪費，之後諗住求其裝番個盤頂上去，點知出咗事！當然係夾口位近漏油，仲要漏得幾勁，只係短短15km路程，已經「噴」到成副機器同波箱油淋淋……睇油尺約冇咗1/10，唉！仲要撞啱聖誕公眾假期，想買番條新膠邊都冇舖頭開，可能要面臨假期冇車用嘅惡浩，慘！第二朝早博一博比D心機整好D唔洗換膠邊，用沙紙省番靚個平面後再唧番D「爭口」膏(之前果次冇省平面)，等咗幾粒鍾D「爭口」膏乾晒之後就著車，點知......唉！真係冇事！所以有D嘢真係唔求其得。不過之前漏油真係好勁，所以用藍威寶狂刷個中缸，再加埋支Gunk牌洗引擎倉泡沫，洗完之後都算唔錯，不過有D隙位始終洗唔淨。死氣蕉O2 senor位己經燒番好，而且個Oil cooler油餅油喉經過一年多嘅監察，都證實咗冇漏油，所以係時候裝番個「蕉com」上去，之前花晒仲有D銹，又用沙紙省吓再噴黑色高溫油，裝番上去遮醜，當堂醒晒！

2007-01-01T11:49:00.000+08:00

O2 sensor搬家了
雖然前排換咗支新嘅O2 sensor，但係近排部車間唔中都係突然冇晒力，高轉爆一爆佢又冇事，Engine燈又冇著，篤電腦又冇code，估計都係O2 sensor作怪，其實O2 sensor係要夠熱先可以正常工作，AE110原廠O2 sensor係安响死氣蕉上，而我果部換咗7AFE蕉就冇咗個sensor窿，而改咗响較後嘅頭批之上，可能頭批死氣溫度較低，加上近排天氣凍咗，如果行低轉死氣溫度再進一步降低，就可能令O2 sensor讀數有偏差。都係要去搞搞佢，本來打算去彩虹，點知佢太忙唔得閒，於是去咗威迅，成疏蕉拆出來鑽窿燒番個sensor位用埋封番頭批個sensor窿，人工包料$800……好似有D貴，不過燒焊手工好好，美中不足係支sensor裝好後啱啱少少貼住條冷氣雪種喉，希望唔好有事啦，另外裝番疏蕉嘅時候hi凹咗少少水箱散熱片，搞到我要自己執番好。經過咗1000km低轉試車暫時未有冇晒力現象，問題可能解決咗！

2006-12-21T13:21:00.000+08:00

最強TRD兵器---保用一年
噚日經過TRD Shop，見到份2007年曆好靚，於是入貨2份，1份送俾阿Joe，其實阿Joe佢鐘意Honda車年曆，又或者窮家女年曆(即冇錢買衫著嘅女……haha)，不過我又揾唔到，唯有用TRD頂住先！自己果份掛咗响屋企，當堂精神咗！

2006-12-21T12:47:00.000+08:00

「卡息卡」
噚日响旺角行街街見到一部好正嘅「卡息卡」(Classic Car)，雖然我對呢類「卡」冇乜認識，但係知道呢部係好嘢嚟！以我所估計呢部應該係一部出產於1962年嘅波子(Porsche)，揸部呢D車出街收視率高過係揸部Ferrari F430！起馬成條街男女老幼都望住，仲影吓相！而且呢D車有錢有面都末必買到，仲要係香港地，都唔知有冇3部！而呢部仲keep得咁好，44年車都冇銹無爛，不過我估計佢係番修大執過嘅！點都好啦，如果我部110keep到40年後，响街唔知有冇人望呢，而家先係9年車……AE86都係20年車左右……哈哈！

2006-12-18T08:27:00.000+08:00

迫力---紅藍綠
套迫力Rebuild完，經過數百公里測試完真係非常之滿意，不過由於要經過一輪超武力對待先可以令積死咗嘅遮整出來，搞到隻鲍魚D金色甩鬼晒好肉酸，所以都要番噴一吓！本來想張隻鲍魚噴藍色，不過迫力皮又係藍色有D怪，所以今次用红色撞一撞佢，隻碟就照舊project mu綠色，實行迫力紅藍綠！

2006-12-14T19:33:00.000+08:00

買唔到金色軨，唯有買金色油
波箱油行咗15000km到晒期，係時候更換，今次聽D車手朋友講，試吓呢隻Valvoline 手波油！金色樽包裝全合成油75W-90，$95 / 1L (另有白色樽包裝半合成油$60/1L) ，睇吓呢幾睌邊睌得閒換咗佢先！5速波箱用3.5L，6速用3L，不過我驚唔夠所以買咗4L先！坊間D人話手波箱冇LSD用油要求唔洗咁高，求其用半合成油就可以，不過波箱油可以用15000-20000km，圍埋差唔多年半至2年先換一次，價錢只差少少($200都冇)，唔好慳啦！而且齒輪响高轉速同高温之下，好容易會「thing」甩D油膜，直接損害齒輪，用D好嘢放心D！順道買埋Valvoline全合成5W50機油，上次8月中換，而家好似行咗4500km，下個月先換啦！

2006-12-14T18:47:00.000+08:00

慘！軨死日本中！
唉！白等咗個半月，今日打去軨舖度問我套新軨嘅下落，點知套軨有三隻色Racing Gold, Racing Silver & Racing Bronze, 好不幸我訂落果隻Racing Gold已停產，不幸中嘅不幸係軨舖寫錯咗我嘅聯絡電話，佢揾極都揾我唔到，我自己又冇check吓張底單自己個聯絡電話……總之就慘！慘！慘！本來都想考慮吓隻Silver / Bronze，但係我部車車身色真係只有金色軨先襯，我又唔想買番來Local番噴，唯有轉過第二隻款，始終軨款同色係好影嚮成部車嘅外表，二手軨就話冇乜得揀要張就，買新軨我一定要最鐘意嘅！其實之前停產果隻真係好嘢來，都介紹吓啦，如果大家鐘意Silver or Bronze色，都可以考慮吓！

套軨係 Manaray Sports(以後叫M.S.)出品嘅Final Speed Gear R，M.S.都係日本一個造軨嘅老牌子，但係冇Works, Volk Rays, Enkei……咁出名，亦因為呢個原因，香港好少人留意同選擇，我揀佢都係因為好少同人撞款，M.S.响日本亦有個別名為ATECH，响yahoo.co.jp搜尋唔難揾到佢嘅踪影！M.S.出品大多數係以大尺吋嘅電鍍軨為主，行日本暴走Feel路線，而我所選擇嘅Final Speed Gear R係唯一屬於較Sports款，軨花係6孖柱向外伸延至軨邊，配合薄胎肚嘅輪胎比人有大一吋嘅錯覺，驟眼睇有少少似Works Emotion嘅5孖柱，不過Works Emotion又裝到通街都係，而且仲有極多台仔抄款，好濫！顏色方面有Racing Gold, Racing Silver & Racing Bronze三隻色 (Racing Gold已停產！) ，尺吋為16x7JJ offset 38mm 4X100P.C.D. 專為Toyota AE系而設，雖然offset冇35mm咁出(平沙板)，但係加5mm spacer已可補償！雖然冇採用鍛造技術，但跟據廠方資料16”嘅重量不足6kg(5.9kg)，呢個重量都可以同現時嘅鍛造軨相題並論！價錢方面就好實惠，响代理wheelink上價錢每隻$1070，我就梗係唔洗咁貴啦，實價就唔好問我啦！去某D軨舖度問就咁比個英文名佢地睇，好多都話未聽過，但係當我比張相佢地睇，佢地通常都係答：「啊！呢隻！我地冇賣！呢隻M.S.係日本牌子xx造o架！唔得o架！」(xx = 台仔，大陸，馬來西亞……)講真我又冇乜所謂，英雄莫問出處，呢套軨乎合咗我嘅要求：offset啱，靚色靚款，少撞款，冇抄款 & 夠輕，我話之佢係非洲造都冇乜所謂！
金色，金色，金色，金色軨真係咁難揾？好不容易我又揾到第二隻款，軨舖話要訂一個月，唯有慢慢等啦！其實真係好心急......望梅止渴，唯有用photoshop執上去「恨」吓先，唉！其實套金色GearR真係好正..........慘！

代理wheelink : www.wheelink.com.hk

2006-12-05T20:25:00.000+08:00

掣動系統修復計劃---買料篇
套VRM Brake Kit用咗超過10萬公里，都係時候搞搞佢，VRM Brake Kit裝落AE車度其實好夠用，都冇乜必要再upgrade上去，其實上次DIY換皮時(約2年前)都發現右邊鮑魚其中一個塵冚穿咗，不過冇理到，上兩個月前後調軨，發現咗D皮得番2成，而且仲大细超(邊厚邊薄)；
近期又發現慢車拖Brake時，縮腳後有D「古……古…..」聲，估計係塊皮少少jam住唔識回位拖住隻碟，行晒成套皮(約3萬km)大细超都係差1mm左右，情況唔算嚴重！
由於近期患上貧窮症荷包乾硬化後群，今次修復計劃budget好有限，加上而家好少激走狂奔，所以都唔會選用Racing料，而且都想體驗一吓平價料嘅實力，修復計劃嘅宗旨係維修多於改裝，唔買Racing皮反而俾錢買套碟仲實際，好！睇吓計劃嘅零件餐單先：
1)頭皮---之前用嘅Project u HD 0-400oC其實都好好，已經用咗2套，今次試吓第二隻！經過幾位車手朋友介紹，今次試用一隻我未聽過嘅牌子----Trestor Advantage，行内簡稱佢叫「藍皮」，聽聞係馬來西亞造，個Spec未有資料，售價$320一套，車手朋友嘅Comment係「靜，少粉，好收，三佰蚊交五佰蚊貨」，所以吸引我去試！

2)頭碟---日本造Mountain牌，同而家車上用緊果套一樣，用咗一年半都冇乜問題，包裝個盒靚咗好多，好強調Made in Japan。更換係因為用緊果套碟新買果陣貪得意，去咗開坑，而家好後悔！開坑係好好收，但踩Brake時有「Wu…Wu…」聲而且有D打腳，兼且套皮快一倍玩完，之前一樣用Project u HD红皮，冇坑碟行6萬km，有坑碟行得3萬km，今次老虎都唔開坑lu！ Mountain售$560一對，VRM係大四孔114.3X4要改細4孔100X4，而中心內徑為69mm要加一個內徑55.05-55.1mm嘅中心圈來Fit落去AE車個合頭度，人工约$400，如果每邊開6條坑，人工約$600左右！
3)鮑魚大修Kit---包括泵拍膠圈，風琴塵冚同埋潤滑膏，OEM都係日本造，質素都唔差，售$180左右兩邊4把遮齊晒，正廠售$700

4)皮彈弓---用黎固定塊皮响個鮑魚度有避震作用，每邊有兩片，我都唔知幾時唔見咗，要番正廠買$150兩邊四片齊晒



5)尾皮---OEM $130一套，正廠$220一套，差$100都冇，有排用，買正廠抵用！之前係用Project u綠色皮，嘩！原來行咗成8萬km，薄到1mm都冇，其中一塊仲崩咗一大忽，真係唔換唔得！
6)Brake油--- Toyota Dot3油，車房代買，穩陣之選！

掣動系統修復後測試報告:
由於Brake都係件涉及安全嘅嘢，所以我都唔敢DIY而交咗比車房代勞，車房師傅表示呢次Rebuild過程真係好「慘痛」，因為拆開晒發現咗D塵冚都爛晒，而且每邊都有一把遮積死咗，要經過「拳打腳踢」等武力對待先可以拆晒D遮出來！加上迫力油嚴重過期，油路裡面都超級污糟，洗都洗死人……活動嘅地方加番D迫力膏上去，而所有接合位都有用3M brake lube，有防銹同潤滑作用。
初初停車試個Brake，踏著感好林，好似踩住舊綿花咁，我就唔係咁慣，車房師傅話Rebuild咗之後潤滑咗parts行得順咗，加上換晒新油，踏著感林咗係正常，Handbrake就低咗好多，2格就可以brake住部車。行車試Brake有好大驚喜，首先已經冇咗開坑碟招牌嘅「Wu…..Wu…..」聲，亦都冇打腳，最正係個Brake Force來得好漸進，踩少少有少少，踩多D有多D，比之前易控制好多，响操控上加咗唔少分，迫力皮亦都冇擾人嘅什聲。直到而家行咗300km，都試咗幾腳重Brake著ABS，絕對冇搶呔嘅問題，不過可能碟冇開坑，始終重Brake嘅極限感覺上都係差少少，不過作為日常駕駛就非常之夠用！

2006-12-04T19:45:00.000+08:00

出售VRM開坑碟已改合AE用
9成新，日本造(Mountain牌)，已改細4孔及有中心圈合AE車用，每面開6條坑超好收，厚度23.8mm(全新24mm)，冇曲冇裂，未光碟有少花，全新料連改裝人工$1600，現售$700，如需光碟另加$200人工，議價免問！交易時間快者得！出售係因為開坑碟制動時「Wu...Wu...」聲好嘈！但屬正常現象！Tel :96633329 Wilson

2006-11-29T05:59:00.000+08:00

出售<<前期>>AE111 GT錶板蓋
99%新，前期AE111GT版原廠零件，炭灰色，極靚極罕有，只合前期AE110用，尾期不合！不包裝！$250

2006-11-28T06:14:00.000+08:00

6速@5AFE
相信好多玩開AE100/110嘅朋友都清楚，5AFE引擎嘅致命傷係6300RPM就cut油，非常之冇癮！而根據廠方數字顯示，引擎最大出力係於5600RPM時出現，原廠5速波箱每上一檔都會跌起碼1500RPM，如果有心轟車嘅話升檔後最多維持4500-4800RPM左右，始終都係要「等」先可以再上去6300RPM，對加速造成一定嘅阻力；即使係一般「悠閒」駕駛，有冇試過上大霧山嘅時候用二波爆晒轉但係三波又唔夠力上呢D尷尬呢？最搞笑係，你越係「悠閒」咁揸上山，佢就越係尷尬……流用上AE111嘅密比6速波箱可以令5AFE引擎嘅表現更加生動，每上一檔都只係跌1000RPM，配合上TRD快波棍、TRD極力子同流暢嘅轉波動作，更只會有800RPM嘅跌幅，加速時令引擎能夠keep响Power Band範圍之內，就算悠閒駕駛模式，只用3波就足以應付大霧山上斜路段；平路加速動力更一浪接一浪般暢快，0-100km/hr加速3波cut油啱啱好101-102km/hr,絕對令5速比下去；但相反0-120km/hr未必佔到好大便宜，因為6速要上埋4波先可以去到120km/hr，有一次轉波時間消耗咗；但5速3波cut油啱啱好係122km/hr轉少一次波！從駕駛感受去評6速，1,2 & 3 波會同5速有頗大分別，即使只係1500cc / 100PSI 嘅5AFE引擎都提供到一D痴背感，2上3波好輕易就响胎(5速較難)；反而我最欣賞嘅係6速波棍清淅分明嘅閘檔提供咗非常之好嘅手感，轉波時有清脆嘅「拍、拍」聲，唔似5速咁模糊！
更換6速波箱都有好多嘢要注意:
1)「傳聞」98年5月前嘅6速銅索牙好脆弱，3或4波好易打柴掃齒，後期製造嘅波箱齒輪經過強化，耐用度大增，不過買中古料冇注明製造日期……
2) AE111BZR 6速係內置有1Way機械恆星齒L.S.D.；而AE111GT係不設
3) 即使係5速換6速都唔係就咁上落淨波箱，因為波棍座&波箱吊膠並不共用，必須一同更換
4) AE100, 101系列如要更換6速，波箱吊膠係完全唔啱裝，要燒焊改位先可以安裝，要注意手工是否完善，因聽聞有部100仔波箱吊膠爆焊

2006-10-31T01:13:00.000+08:00

後備軨胎K1 Racing + Yokohama AVS Sports.
套16” Yokohama Advan TC + Toyo Vimode終於放咗！其實呢套胎軨真係正嘢嚟，軨又超輕，雖然係超舊款，但係個樣一D都唔Out！而且7”闊offset 35又正正Fit晒AE系車種，市面好難揾！套胎雖然係Toyo Vimode，並唔係D高性能model，但係總算夠用！而且195/45/16基本上係同195/50/15係幾乎同size，因此起步性能冇減弱到！

其實已經訂咗套16” 日本超輕軨，要12月中先到港，暫時保持神秘唔講係乜嘢軨先，呢套軨我咁耐只係响部Runx見過一次，仲要唔係我訂果隻色，我貪佢唔會咁易同人撞款！而且台仔軨亦未見有抄款！尺吋方面係16”X7JJ, offset 38mm重量只係5.6kg，真係好輕！我係舊年响D日本website度一睇到就好鐘意，但係又唔捨得換。除咗上次响部Runx見過一次實物之外，我都係憑空想像，唔知襯落部110度會點……我都好心急快D到貨，到時再介紹！

06年初响car8度執咗套全新Yokohama DNA-GP(ES100水貨)，尺吋為195/45/16，超值價$1600好抵好抵，放埋咗响阿Joe公司度成8個月，終於要出山！响呢段過渡期間，暫時因住阿Joe套後備胎軨先，日制K1 Racing 15”X7JJ offset 38mm + Yokohama AVS Sports 195/55/15，真係唔該晒阿Joe！呢套都係好嘢嚟，我地磅過淨軨约6kg！同樣7” offset 38mm極之fit AE車系，不過白色軨太Sharp，唔太襯我部110，暫時用住先，而offset 38mm亦唔啱Honda Jazz GD1，套軨太闊「雅」晒出嚟，所以佢用咗一排都係放咗响公司！
呢套K1 Racing 連AVS Sports會响12月中我套新軨安裝後出售，有意可以同我傾傾！

2006-10-16T06:15:00.000+08:00

售16”日本輕胎軨

之前已買落左套195/45/16 Yokohama DNA GP胎收起左，而家想買過套新軨連埋套DNA GP一齊裝，所以想賣左而家套胎軨

輕軨
堅日本造Yokohama Advan TC 一代，尺吋為16"X 7JJ offset 35mm 重量7.56kg，之前番噴金色，軨邊有少花，冇變型，80%新，極適合全線AE車系，平尾沙板，極好睇！

輪胎
Trampio Vimode 195/45/16，80%新，正常冇省胎，特别size闊度195，唔會hi沙板，亦唔會影嚮起步加速，新買時要special order，價錢特貴

現平售：
1)$2500全套胎連軨，或……
2)淨胎售$1200
3)不賣淨軨

2006-10-04T12:39:00.000+08:00

友好Blog介紹---Aero Jeff
細細個嘅時候成日失約放人飛機，而家大個咗又好想玩吓放飛機，不過係遙控模型果隻！前排同一識咗好耐嘅AE110車友吹吓水，原來佢有放開飛機，於是參觀吓佢個Blog，嘩！原來放飛機都好有學問，除咗要有好強嘅動力去令隻飛機起飛外，飛行重量都好緊要，玩真車車重就以Kg做單位，放飛機就用g去計算，比真車要有更高精度，利害！大家有興趣可以去我老友嘅Blog-- http://jefftang.blogspot.com/ 果度睇睇！Aero Jeff條link亦加咗响右面嘅友好連結入面！

2006-09-26T15:55:00.000+08:00

德士古道天橋間封
青衣北橋往德士古道天橋間封
前幾日經過青衣北橋往德士古道天橋荃灣方向，見到天橋起點(近荃青交處)有個禁止駛進牌(紅圈中間空白)，下面有個時段牌但睇唔切係乜時段禁止駛進，後來去到天橋終點(近荃灣花園)，見對頭反方向都有個禁止駛進牌，於是女友回頭望見到時段牌「好似」寫住12:00am - 8:00am

有冇人知？

2006-08-29T04:03:00.001+08:00

頭尾迫力皮夠期，有乜推介？
頭尾迫力皮得番2成，係時候換，之前2次都係用Project u HD 0-400oC皮，其實唔錯，行街夠用有餘同時好少粉，今次好想試吓其他牌子，最重要係少粉，其次價錢要平，最好$500樓下！而家好少開快車，制動能力要求唔洗太高，0-400oC就可以！加上用咗Galant VRM孖遮鮑魚已經好夠收！已經research過幾隻牌子：
頭皮：
1)Project u HD-- $700，少粉夠用，唔傷碟，但已用過2次，唔再番用！
2)三菱廠皮-- $450，正廠料，保守冇鑊氣，價錢合理！
3)日本OEM -- $380，聲稱好過三菱廠皮，由於係藍色，坊間叫「藍皮」
4)冇牌子什廠--$160，平到唔敢用……有冇人試過？
5)Delphi LockHeep-- 價錢未知，英國大牌子信心保證，0-550oC
6)Winmax -- 價錢未知，性能未知，日本牌子，有冇人試過？
7)EBC --價錢未知，英國牌子，聽聞好傷碟

尾皮：
1)豐田正廠-- $220，正廠料，保守冇鑊氣，價錢合理！應該會用
2)日本OEM -- $130，尾皮有排用，只係平少少，用正廠料穩陣D

尾皮就一定用正廠；頭皮想試Winmax，Delphi 或日本OEM，視乎價錢，有冇朋友有其他推介？分享吓啦！

2006-08-29T04:01:00.000+08:00

0-100，9秒7
都好耐冇試，之前試過最快8.9秒，今次試咗3次，最快9.7秒都算中規中矩，0-100km/hr加速有好多因素影嚮，呢次keep住4000RPM和住個極力子起步，條胎打滑得幾勁，可能地面有D沙石，另外一波轉數上得太快，cut咗油先上二波，浪費咗少少時間，始終車手嘅轉波時間同動作嘅配合係非常十分之重要，唉！我自己就技術有限加上唔可以狂試(極力子貴呀大佬！)，加上AE110致命傷6300RPM cut油……真係車又冇力，人又冇術！如果以一部EK細Tec輕量改裝已經輕易造出9秒以下嘅成積……

2006-08-29T01:01:00.000+08:00

Clean it up, 從此冇鼻塞！
換完機油，火咀，風隔之後，都係時候洗一洗蝴蝶瓣，坊間有好多噴射式嘅清潔劑係直接响蝴蝶瓣入口直接噴射清潔，用法簡單方便，效果就見仁見智。我自己就鐘意成個拆出黎洗，咁樣會徹底D！年事高嘅AE110通病係怠轉不穩，最主要嘅原因係蝴蝶瓣下面果隻怠轉入風調節嘩佬被碳屎積死不能正常活動，導致怠轉不穩！清潔後就冇事！

2006-08-16T00:49:00.000+08:00

靜咗！順咗！爽咗！開心咗！
終於抽到時間換晒機油同火咀，機油係用Valvoline5W-50全合成，火咀係用NGK銥金钃6度，效果好好，怠轉引擎聲同死氣喉聲靜咗好多！起步加速順咗好多！Highway中高轉表現亦爽咗好多！部車揸起來，我都開心咗好多！哈…...哈…...哈……！

2006-08-16T00:40:00.000+08:00

裝拆軚環唔係咁易~~~
裝拆軚環要好小心！好多車房都唔知點解成日都搞死個氣袋訊號……拆軚環時最好係保持正直方向，線圈上有2個「箭咀」提示，當在正直方向拆出軚環後，Top箭咀係啱啱好向正上方，緊記千其唔可以移動(旋轉) 線圈！！因為線圈旋轉極限為5圈，如果胡亂地旋轉，會導致軚環安裝安裝線圈左右不平均，就算真係要移動，必須Mark低移動前嘅位置！安裝軚環後响一般行車時未必即有故障，但當泊車或調頭時經常扭盡軚環後就會扯斷線圈電線而令氣袋故障！！如果扯斷線圈，更換就可以，二手約$300-500(海鮮價)，全新…….唔好問啦！

2006-08-14T00:43:00.000+08:00

出售火咀線
出售TRD火咀線, For 5AFE, 4AFE Engine, AE100, 101, 110
Price : $400, 90%新
出售原因: 無聊, 想試其他牌子!
Reply in this post ok.
Thanks
Wilson

2006-08-10T23:55:00.000+08:00

馬力番來啦！
換完O2 sensor同Filter，就出去試車，我嘅Test Track係機場跑道外圍，O2 sensor更換後，之前嘅侄油，3500RPM以下冇晒力，全都消失！而且和油行車仲順咗好多！正！响機場附近有個空地，影咗幾張相留念！AE110！你好靚仔呀！

2006-08-10T22:50:00.000+08:00

換D唔換D……
終於都裝番支新嘅O2 sensor，都幾辛苦！原裝AE110嘅O2 sensor係裝响疏蕉度，打開頭com就換倒，好易；但係我果部改咗7AFE 4-2-1蕉，4AG頭pipe，所以sensor位係响車底嘅頭pipe，要積高部車先得！跟手換埋個HKS Filter，嘩！對上果個用咗15000km，變咗啡色！不過機油同火咀留番下次得閒先換啦！

2006-08-10T00:38:00.000+08:00

DIY日
好耐冇親自出手整個部車，呢排忙咗DD，噚日買咗Valvoline機油，正廠油格，NGK銥金6度火咀，連埋支O2sensor，仲有個HKS Super Air Flow東菇海綿，聽日用半日時間搞搞佢先！順便跟一跟尾箱內格有D雜聲！

2006-08-10T00:27:00.000+08:00

洗桶椅
成日掛住洗車身，內籠原來好污糟，兩張桶椅好多漬一撻撻！前幾日的起心肝，用果D專洗地毯嘅噴泡洗吓佢，即刻乾淨晒，D漬起晒，仲有陣香味！正！

2006-07-29T06:36:00.000+08:00

「含嘢」聲洒---含一含，零捨醒神
引擎踏入150000km，都可以算係高齡，响約120000km嘅時候因為氣缸內部嚴重積炭，導致遮軨漏氣而不能壓縮混合氣，簡單嚟講即係「冧計」！！嚴重積炭主要原因為含氧Sensor(O2 Sensor)打柴導致，O2 Sensor响引擎運作上佔有舉足輕重嘅地位，Sensor內部由化學物料制成，偵測排氣內的氧氣含量，再轉化成電子訊號(0-1.5VDC)傳送至行車電腦(ECU)，ECU會根據入風流量(Air Flow)、油門角度(Thottle Position)、爆震感應(Knock Detection)……..好多好多數據去計算出供油量，以維持空燃比率(Air Fuel Ratio)响正常水平(14.7:1)，令引擎效能有最佳嘅發揮！O2 Sensor內嘅化學物料係屬於損耗品，會經長期受高温排氣損壞，導致偵測氧氣含量數據偏差而令ECU不能正確指揮供油量，最終都係令引擎效能下降同耗油量上升！O2 Sensor冇一個準則「幾多年」或「幾多km」去更換，一般AE110都近8-10年車齡，行車里數約超過100000km就最好留意吓，有好多朋友成日覺得部車又大食又冇力，又洗蝴蝶瓣、油路、換風隔，機油、火咀……都未能解決問題，更換O2 Sensor都可能有意外驚喜！！
更換O2 Sensor要注意，千其唔好用中古嘢，始終屬佔損耗品，品質冇保證，我就係1年前用$300劏咗枝中古嘢，而家都都係打柴！而且只有尾期AE110 5AFE先對應，因為係2條線(見圖)；AE110前期、AE111，AE100，AE101全部都係單線，而ST191, 205就用4線！所以最好返皇冠車行或去Tom’s & TRD Shop對車身編號訂購，我就係去TRD Shop訂，$850 (唔好話我講呀)！正常AE110 O2 Sensor位置係排氣蕉下方，近水箱底位置，DIY更換好容易！

2006-05-10T15:02:00.000+08:00

紅色好D......
粒轉波燈換番紅色長著，好D啦！

2006-05-06T12:41:00.000+08:00

RSM追加功能----捉虫轉波燈
好鬼無聊……於是搵D無聊嘅DIY玩吓，其實個Apexi RSM仲有2個功能未用，就係佢可以响指定轉數同埋指定車速，分別地接通2個12VDC嘅訊號，即係話可以响某轉數同埋車速去啟動電器. 好自然轉數果part梗係整轉波燈啦！响鴨仔街買料$30，LED，LED膠榖，電線，電阻，鋒嗚器同埋細線插……主要係搵條長火經鋒嗚器去LED再經RSM接地就OK，鋒嗚器好大聲"Beep....Beep"咁叫，我就狂包電燈膠布收响錶板內格，大細聲就OK番！LED我就咗响A柱錶榖度，但係錯誤地揀咗超白閃光，整完夜晚去遊車河比粒LED嚇咗一跳，好似中快相閃光燈咁，心都寒埋！！要盡快換番紅色，好彩我係用線插駁粒LED，隨時可以換……呢次真係捉虫！！

2006-04-28T01:20:00.000+08:00

喉
「胎軨、避震、喉」呢三樣可以講係改車嘅指定動作，不過對於AE110黎講，死氣喉可以講係最「麻煩」嘅一項改裝！一般街車排氣系统設計都係切件式，通常都係分開蕉、頭Pipe、催化、中喉及尾喉，中間係靠一D俗稱「法蘭」嘅東西接合，都唔知係生產成本問題，定係日本廠方認為AE110嘅死氣喉設計係近乎完美，不需維修、更換或作改裝……其設計除咗蕉之外，由頭Pipe、催化、中喉至尾喉係一體化，即係中間完全冇接口位，萬一任何一部份有損壞就要整條更換，設計非常失敗！！亦因為呢個原因，AE110改裝死氣喉嘅選擇係好少好少！正路而工序簡單嘅，有TRD或SheepDog尾喉，安裝方法係Cut斷原裝中喉打後位置，再套上新尾喉即可！SheepDog有N組同大尾豉，兩隻我都未試過，有D朋友裝過大尾豉，新喉D聲都好沉實好正，全不銹鋼造賣相好好，性能方面就唔清楚，價錢都好公道，Promotion賣$1800連安裝，但係兩年左右D聲就散晒拆晒……

TRD尾喉我就响10年前AE100時代用過，中喉直徑48.6mm，尾喉咀直徑76.3mm，聲音方面係好「低調」，無論低中高轉都好似有層隔音屏隔住D聲咁，而且好實聲，好正！性能方面就低中轉反應同原裝差唔多，4000轉後上得快咗少少，可能我以前部100仔係AT，所以好多馬力比個波箱食哂！不過TRD喉只係用普通鋼材製造，以$3700售價未必有說服力叫人去買……另類選擇嘅，我都用過一條EK4專用嘅5Zigen Fireball N組喉當然係cut尾鼓燒焊安裝果隻,嘩!呢條喉D聲好爆同好尖!唔似大尾豉咁沉實3000轉打後直頭震耳慾裂,我仲記得起初好鐘意果種聲，好有racing feel，雖然3000以下反應有D呆，好彩中高轉上得快彌補番！但係用咗一排之後覺得嘈好煩，尤其highway 常用3000-3500轉，D音響扭到極大聲但係都聽唔到，激死！
另一選擇係位於火炭嘅威迅(Wilson)出品嘅S不銹鋼尾鼓(唔好誤會，咁啱同名咋，我冇份架)！雖然我冇用過，但係我有個玩B14 Sunny嘅朋友就用緊，性能我就唔清楚，車主就話頭中尾都好咗，好堅！同埋用咗3年幾都冇乜問題，我就覺得D聲真係唔錯，有D似TRD果種低調沉實聲！而且呢間威迅都幾專業，度位燒焊同安裝過程都好有水準，唯一保留係佢始終係土炮造，凈尾豉連安裝要$2800，中至尾連安裝要$5000，抵唔抵見仁見智!如果想進一步擴大改裝空間，可以張整套排氣系統改成AE111流用，方法係响催化器打後位置開刀，再焊上原裝款嘅法蘭，咁樣做嘅好處係可以對應所有AE111嘅喉，改裝自由度大增，不過最好搵專業D嘅死氣喉公司(例如威迅或彩虹)，

因為如果施工欠佳可能令日後尾鼓安裝有走位現象，呢項改裝工程費用都唔平，度位、開刀、燒焊、裝尾喉全部約$700-1000，有D細車房$300有交易，視乎情況。尾鼓選擇方面，最平而有效果嘅係AE111原裝尾鼓，我之前用過，連埋個喉通型假催化,頭段好有力上，尾段仍然有少少頂住，聲音方面係典型原裝喉聲，二手價約$500-800，係平價中嘅好選擇！有好多人會用AE101嘅燕子喉，貪佢有左右大細尾鼓，低轉只用細鼓排氣保持扭力，高轉時會兩邊出氣增加馬力，呢個設計係好好，不過條喉嘅重量會倍增，而且安裝亦唔係咁易，我見有好多AE110裝完之後條中喉隋下，成日撞底，加上最新只有95年，所以質素上有D保留，潮濕嘅雨天如果見到條燕子喉响怠轉嘅情況下，兩邊大細尾鼓同時都有水蒸氣出，其實代表條喉已打柴！

Racing喉方面我就用過柿本改中至尾大尾鼓，個賣相好「搞笑」，唔好以為佢個咀好大，其實係假狗，裡面個咀先係真嘅，柿本改D聲好勁，但係冇N組咁尖音；屬於沉實大聲果類，低轉都有聲，可能尾咀較大令回壓唔夠，同埋個喉通型假催化嘅關係，性能就低轉比較冇力，但過咗3500RPM後馬力就出現至cut油，如果唔嫌太嘈，其實都唔錯!之後好采比我揾到條FGK LegalisR中至尾，係有個朋友部AE111BZR裝咗2個月吸四Total Loss咗賣比我，好抵！中喉直徑60.5mm，尾咀90mm，係著重低扭嘅設計，呢條喉D聲好正！似TRD果種低調實聲，性能就頭段好好力，同AE111原裝差不多，可能我換呢條FGK嘅同時，亦裝番個原裝4AGE催化，所以高轉冇柿本改咁放，但係都夠出！另外亦有FGK PoweGetter, HKS, 5Zigen, TRD(4AGE), Tom’s等等……好多好多，我都冇用過所以冇Comment！

有關FGK LegalisR 嘅官方數據，可以睇呢條Link
http://www.fujitsubo.co.jp/search/prod-v.php3?prodID=000000000000001030&cnamID=00000596

2006-04-18T00:30:00.000+08:00

10,000km
多謝各方好友瀏覽小弟亂up一通嘅Blog，日前終於突破10,000km，日後會繼續同大家分享小弟所見所聞！謝謝！

2006-04-13T19:58:00.000+08:00

三菱@豐田
AE110嘅原裝迫力可以講係啱啱好唔夠用！！大家可能誤會我係指飛車果陣唔夠用，非也！據廠方數字公佈，AE110連5前速波箱冇天窗型號，淨車重量為1130kg，其實當單人作日常駕駛係還可以(假設一位成人重量為70kg)，但係當滿載5位成人嘅時候，共350kg，負苛激增30%，重未計算什物行李等重量，如果滿載時候响斜路有突發情形需要拖慢或急剎，情況就好不妙！(自動波重大鑊！)就算真係好彩逃過一劫，我估全車人都嚇到一額汗！如果唔係經常重載或揸快車，換套Racing皮其實都幾有效果，我最初就試過原裝迫力落套Endless NA-Y 50-550oC皮，除咗迫力反應敏銳咗少少之外，最大分別係迫力耐力長咗好多，腳軟現象延遲咗！不過缺點係好多粉，好污糟！之後就裝咗一套AE101大單遮迫力，唉！原來只係條橋同隻碟大少少(隻碟直徑大2cm左右)，隻鮑魚同迫皮係一樣，反應分別唔大，冇乜用！之後(好多年前)有人發明咗用三菱Galant VRM(以後稱VRM Kit)原廠孖遮鮑魚連碟，張原本盒頭個縲絲窿「料」大少少(約2mm)，就可以直接裝上，唔洗搭橋！隻碟要由大4窿改造細4窿，另外隻碟中間要加隻中心介子，好處係大部份15”軨都裝到。中古料約$1200-1800左右，視乎新舊或已改位與否。Galant VRM車重約1500kg，200匹馬力，所以佢嘅Brake Kit對應番落AE110度係好足夠，而家有好多AE110都裝咗，我個人覺得VRM Kit快車時候反應好漸進，大腳踩又可以好應，就算部車載滿人同行李，都可以好有信心咁停低部車！至於用黎飛嘅話就更加唔洗講，如果「夠膽」掌握得到，Late Brake入彎可以幫你拋離對手！不過條胎唔好太雞，一般ES100，GII, GIII以上都可以，濕地就比較易Lock Tire著ABS，尤其是濕地過沙井蓋位踩Brake！而且初初裝咗，泊車或極慢車速時輕輕「Hi」吓個Brake會有D「Chok」，不過習慣咗冇耐就冇問題！講番迫皮，我建議如果中古料跟番黎套皮唔太薄，可以用住先，因為可以習慣一吓Brake Force強咗嘅變化，日後夠期先再換Racing皮，番三菱買正廠皮有2個選擇，一隻原廠皮約$250/set；另一隻藍色Sport皮$400/set(三菱廠行內叫藍皮)，我冇試過唔知效果，只聽聞好多粉好污糟！我自己就用開紅色Project u HD series, 0-400oC，呢隻皮我覺得好正所以已經番買第二套，好處係冇乜粉好乾淨同冇雜聲，另外唔傷碟，隻碟用極都好令，而且耐力同反應都好好！响九龍灣Improve買$650/set裝工$100，可能你會覺得0-400oC唔夠，咁可以試吓其他高級D嘅皮，但係通常會污糟D傷碟D同有雜聲！其實我試過用温度搶度過，我連續5腳重迫Lock Tire停車，温度約200-220oC，當然實戰又拖迫又重迫可能又另一回事！不過我好少咁飛法，400oC我夠用啦！至於迫碟方面，中古料跟番黎套碟如果凹凸不平或好花，可以攞去機器舖光一光碟，約$200光2隻碟，不過要留意最少厚度為22.4mm(通常碟背面係有刻住個最少厚度)，如果太薄就要更換，否則影響制動能力！！買碟有好多選擇，高級嘅有AP或DBA，$1800-2300/set已開坑，我就唔捨得買所以唔知有幾「堅」；平嘅有三菱正廠$1200/set；日本什廠OEM$600/set(亦聽聞可以用Toyota Celica碟但我冇資料)，我呢尾窮人就梗係用最平最濺嘅什廠OEM啦！佢係日本Mountain公司製造，用落都冇乜缺點(可能我未用過貴嘢唔知有乜優點)！開6條直坑、改細4窿&車隻中心介子都要$600-800，所以算係一闊三大……開坑嘅好處係坑紋不斷削去迫皮，令迫皮經常以新嘅層面工作，另外當制動時皮與碟之間有一層氣墊(Gas Cushion)會減弱磨察力，坑紋亦可有效幫助排走空氣！！但係開坑亦有唔少缺點，制動時會有擾人嘅Wo…Wo…聲同高頻嘅震動，另外迫皮壽命亦會大減！！如果我再換碟，我就一定唔會開坑，始終我都唔係飛果隻！

2006-04-04T04:47:00.000+08:00

熊貓眼
車頭燈等如部車嘅眼睛，對於部車嘅外觀係非常十分特別重要！車頭燈清楚乾淨，顯得部車有精有神，燈映都光D！不過有D人用110-120W超光超白炟由於太大火數，久而久之燈穀入面嘅電鍍反光層底受唔住高温而變黃碌落，嚴重嘅甚至燈穀入面會溶化，而且有D仲熱到連個透明罩都變黃，搞到架車好似有「肝病」咁眼都黃埋，就算用7500K白炟都冇用啦！其實而家好多HID Kit係台仔 / 韓仔造，價錢都頗大眾化約$1200有一套，HID嘅好處係無論耗電量、火數、温度都比傳統燈坦低，而且光好多，K數又高去到(超過)白色，對於燈穀入面嘅電鍍反光層都唔會咁傷！當然如果負擔唔起仍然可以選擇傳統燈坦，但係要留意火數唔好超過85-90W，雖然冇咁光，但係亦冇咁熱！而且千其唔好以為火數大就等於白D，火數同K數係兩回事！另外有好多燈坦為咗提高K數整白D，會响燈坦表面coat一層藍色物質，要小心啦，因為呢類燈坦係驗唔倒車嘅！講完燈坦，又講吓燈穀，可以咁講AE110如果換套熊貓眼黑底燈，個樣即刻型爆十倍！尤其係淺色車身，白色、銀色或者香賓金色……車頭會變到好Sharp好型！用美學角度具體D講，黑底燈浮現咗D線條同層次出來，再唔似原裝燈咁銀色一舊！又如果襯落深色車身度，雖然效果冇咁Sharp，但會有一種好「惡」同神秘嘅效果，夜晚睇就一流！日本正廠Toyota係冇出黑底燈嘅，台仔料就有出，大燈同角燈都有，不過台仔燈有幾個缺點：台灣係左軚車，燈映方向係同右軚車相反，如果驗車嚴DD，「燈映方向不正確」有可能肥佬；而台仔燈用料較為差，即使冇用大火數燈炟，電鍍反光層同透明罩都好易變黃，頗為肉酸；另方面台仔燈嘅燈碼位造工好參差，安裝後成日都有走位或唔貼邊嘅現象；仲有佢嘅角燈造工就真係麻麻地，角燈邊沿位竟然有條白邊圍住，雖然好幼身，但黑框撞白邊好現眼，都幾「失真」！其實企遠D睇都勉強可以接受，而且台仔燈售價較平，買番來一裝就OK，方便！如果要求唔高其實都可以考慮一下！另一個選擇就係好似我咁，用日本正廠Toyota料DIY噴！不過工序頗為煩複，除咗要有耐性同心機之外，最重要就係要解決防水嘅問題，如果工序正確，效果比台仔燈好好多！至少係右軚燈映，Fit位同唔易變黃，大家不防試試！為咗令我部車套黑底燈歷久常新，我通常約2年左右就換過套新燈，有D變態？又唔係喎，套舊黑燈通常都有7成以上新，成套放出去$1000唔難，再補$200-300買過套新燈DIY，又唔係貴喎，hahahaaaa !

2006-04-04T04:42:00.000+08:00

TRD VS Good Morning
噚日响T & T Shop買咗套Tom’s安全帶墊，之前都係一樣，不過經過長年催殘，又甩色又爆線，終於要換，新嘅挺直好多喎！另外，唔知係乜嘢文化，好多人都响尾座後面放番條毛巾，用來抹車？定係用來抹手？不過我就唔捨得lu，條TRD毛巾成舊水咁貴，我放响度做裝飾算啦……洗車洗手用番果D一蚊條嘅「Good Morning祝君早安」毛巾！hahahahaaaa！

2006-03-27T18:24:00.000+08:00

地毯
有人問起，即本講吓，可能因為AE車系嘅版本好多，所以Toyota推出咗好多款原廠地毯，而且AE系地毯有一個優點，就係絕大部份唔同版本都可以流用，即使係單門或者四門都可以！好似我而家用緊呢套咁，係我一個揸單門掀背AE92 GTi嘅好朋友賣比我，而原本應該係屬於AE111 BZR Levin嘅，所以上面有Levin字樣，其他版本有杏色厚毛Corolla字，黑色Tureno……等等，什至有Wagon字我都見過。二手價由$200-500不等，我果套買咗$400！原廠地毯嘅好處係用料靚，款式靚，而且最正係唔會走位！點解？首先後座果三張係有「拍鈕」，三張「拍」埋一齊fit晒冇得走位，而最正係司機位果張右下角有個鐵環，係有隻「鈎仔」卡住張地台毯，就算你點踐踏，點踭趾，都唔會走位！！隻「鈎仔」响邊度揾？所有水貨版本係有嘅，買全新都只係幾十蚊，不妨整番套！

2006-03-24T16:21:00.000+08:00

洗底褲……
聽日後日連中2紅彈要做花車，本來想大洗打腊，不過呢幾日天陰陰仲落大雨，打腊都係晒料，於是齋洗車算啦！其實成日掛住洗車身，個內籠好少洗，原來好鬼污糟邋遢，地毯底係超級勁多沙，而張地毯面更加唔洗講，仲有陣up臭味，天花毯仲勁多積，皮梳化冇晒光澤，軚環又係，今日終於頂唔順拆套地毯番屋企用强勁吸塵機吸塵，嘩！吸完塵盤水黑過芝麻糊，仲有好多狗毛頭髮…..好嘔心，之後再用地毯噴泡洗刷，然後再用抽濕機抽幾個鍾，當堂冇咗up臭味！內籠就用汽車吸塵機吸塵，皮梳化、軚環、門板同錶台，就用藍威寶起積，再噴No Frills碧麗珠，呢支嘢平過堅嘢碧麗珠一半，$35兩支(堅嘢碧麗珠$39一支)，效果都唔錯，天花毯用地毯噴泡洗刷，乾淨晒！仲買咗個香必飄香精裝埋！好好多！

2006-03-23T09:21:00.000+08:00

Turbo Timer / NA Timer ????
都有好多人爭論過嘅題目, NA車要用Timer嗎? 先了解一下Turbo引擎嘅特性, Turbo內嘅轉子通常係由2粒杯士(或啤令)承托住, 用機油去潤滑嘅, 而轉子當運作時係會近成萬RPM, 當一輪激走之後Turbo會極之高溫, 約有600-700oC, 如果一下子熄掉引擎而停正機油運行散熱, Turbo轉子同杯士可能變形, 俗稱「銷Turbo」, 因此要靠Turbo Timer延遲引擎熄掉, 保持機油運行令Turbo降溫後先熄掉引擎. NA車用得著嗎? 其實又冇好肯定嘅答案, 當出完車之後, 油溫通常有95-100oC, 我又試過等一陣間, 佢又會跌到80-85oC, 我估差10-15oC其實又冇乜所謂, 但係有陣時激走完後, 油溫有成110-120oC,咁好似有個Timer好D, 110oC去85oC都要成4-5分鐘, 我用Timer 就set死1.5分鐘, 其實個Timer都係幾舊水, 買番黎玩吓又無防! 不過買之前留意Timer同防盜要夾先裝倒, 最好問一問人先好買!

2006-03-20T18:02:00.000+08:00

儀錶唔單止係裝飾
而家好多人都响車上安裝儀錶, 油溫, 水溫, 排溫, 油壓, Turbo Bar …..etc, 林林種種, 當中有唔少人都係當D錶係裝飾品, 加強車內嘅Racing味, 儀錶讀數卻愛理不理; 其實儀錶可以比我更了解引擎嘅運作狀况., 如果時刻keep住引擎正常運作, 其壽命亦會更長. 不過若然死踩爛踩, NA引擎一樣承受唔住, 如果針對AE110安裝儀錶方面, 不外乎油溫, 水溫, 油壓 & 真空錶(按重要性排列):
油溫錶—非常重要! 可以直接了解引擎嘅運作狀况, 即使我部AE110引擎冇乜改裝(來來去去都只係火咀線, 東菇同死氣喉), 一般Highway 100-120km/hr, 3000-3500RPM巡航油溫約85-90oC, 但係當上長命斜山路(eg.:大霧山), 就算我只係放慢揸, 60-70km/hr, 3500-4000RPM, 由於上斜引擎負載大好多, 油溫標升至105-110oC, 好危險, 唔好忘記我部車係設有Oil Cooler…….!! (之前冇Cooler, Highway95-105oC, 長命斜115-125oC, 所以先考慮裝Cooler……)
水溫錶—可能你會問:「錶板上面都有個水溫錶, 加多一個有乜用?」好奇怪! 裝咗水溫錶之後, 發現無論水溫由40oC – 90oC, 錶板上面嘅錶都係指住中間, +/-一支針位左右, 意義不大! 錶板唔準咩? 非也! 只不過係錶板水溫錶嘅Scale好大, 而且反應亦好慢, 所以指針動作較細, 所以當錶板水溫錶指主上面先至發現問題經已遺時已晚. 水溫讀數好大範圍, 慢車或塞車80-90oC, Highway30-40oC.
講多少少關於安裝油溫, 水溫錶, 主要係Sensor嘅安裝位置, 油溫sensor有人裝响油pan底, 有人裝响油餅, 視乎你要監察邊個位置嘅溫度, 油pan底嘅機油係冷卻咗, 通常都係低溫D! 至於水溫sensor有人裝响上水喉, 監察冷卻引擎後出來嘅水溫, 通常都係高溫D; 亦都有人裝响下水喉, 監察水箱冷卻後嘅水溫, 通常都係低溫D同埋讀數會因為車速及天氣而有頗大嘅變化(30-90oC), 因此有好多人都爭論同一款車但係油溫水溫差咁遠, 好大可能係Sensor嘅安裝位置影響!!
油壓錶—油壓過高就好少聽聞; 油壓過低就危險少少, 即係代表機油流動得唔夠快(甚至冇流動), 引擎所產生嘅熱量不能被帶走冷卻!後果一樣嚴重. 油壓過低主要原因不外乎零件損壞漏油, 機油泵老化, 外加油路裝置如油Cooler, 機油度數太稀或過期更換…..etc! 其實油壓錶嘅用途較為次要, 因為而家造車技術好好, 引擎造工亦好進步, 好少會出現漏油現象, 當然後天人為因素除外. 另外如果裝咗油Cooler, 最好裝番個油壓錶, 因為油路長咗(Cooler + 油喉), 油壓亦都會有所流失. 以我嘅經驗, 凍車怠轉同高轉油壓約5-5.5bar, 因為機油凍嘅時候黏度較高, 壓力較大; 熱車怠轉油壓約0.3-0.5bar, 而高轉約5-5.5bar, 唔同牌子, 度數嘅機油, 讀數會有多少出入. 最後, 如果油壓錶指示唔穩定或跳動, 表示機油內有好多氣泡, 亦即係機油內嘅「化泡劑」失去效用, 通常係機油曾經過熱或過期嘅徵狀, 需盡快更換!
真空錶—我會用「得意」去形容, 因為佢隨住你踩油「發吓發吓」, 好鬼過癮. NA車專用,類同於Turbo車嘅Bar錶, 一般以InHg或Bar為單位, 監察引擎進氣管內負壓讀數, 亦可了解引擎負苛, 當深踏油門蝴蝶瓣全開嘅時候, 大量空氣進入進氣管內, 即係進氣管內負壓與大氣壓力相同, 指針指向0InHg; 當鬆開油門蝴蝶瓣全關嘅時候, 氣缸燃燒進氣管內嘅空氣形成負壓, 指針指向25-30InHg, 如果適當觀察運用, 可以減低引擎負苛從而降低耗油量
日本造定台灣造好?巿面上儀錶嘅牌子有好多, 日本造嘅有Defi, HKS, Blitz, Greddy…..精確度高而且賣相好好, 有D仲有Peak Hold 同Record Playback功能, 不過價錢好貴吓, 真係唔捨得……至於台仔錶質素都唔差, 明科, Autogauge同A.D.I. 都幾好, 有好多人都話台仔錶唔準, 其實好有可能係安裝上嘅問題, 台仔錶有個缺點, 就係佢D sensors得一條訊號線, 回路(落地)係靠Sensor外榖經引擎外榖接地, 當安裝嘅時候為咗防止漏油(漏水), 我地會用「多少少」防漏膠布(俗稱士黏膠布)包住Sensor, 但係咁樣會令回路Sensor外榖同引擎外榖絕緣或接觸不良, 影響儀錶準確度. 而其中A.D.I. 嘅Sensor就比較好D, 因為佢同日本Sensor一樣係有一條回路線接地. 另外有D所謂日本造嘅機械式儀錶就唔係咁好, 例如Omoni, 因為佢係由一條幼嘅油喉(水喉)接駁到錶背後, 如果不幸條油喉爆咗, D機油就會噴到一褲都係……小心

2006-03-12T07:57:00.000+08:00

點「樣」好？
今個月尾中咗兩個紅色炸彈，仲要係連續兩日做兄弟幫手揸車！唉！其實我部110唔係唔好睇，不過有陣時出席D莊嚴少少嘅場合，好似有少少飛仔車咁！個個都Ben屎、寶馬……噚日心思思攞番個原裝鬼面罩&三星章裝落部車度，希望有番D「斯文大方」look，起初都睇唔慣，好似格格不入咁，睇耐咗又好似ok，各位朋友比個意見我點「樣」好？Thank You !!

2006-03-08T02:22:00.000+08:00

KOBA @ jazz.com
阿Joe話舊電就打柴，無他嘅，佢舊電同我對上果舊都係GoldStar，佢2年前遲我2-3個月裝，我果舊電2個月前又係打咗柴，而家又到佢，好正常！唉……佢又叫我帶佢去換KOBA電，換埋同牌子同model，跟鬼住我，分明當我係燈，即係話若干時日後我果舊電打柴，佢果舊都差唔多……%$^#@!& ！！阿Joe，講明先呀，我上次係趕時間先求其換，唔知呢佢韓國電耐唔耐用…….不過就幾好款，細細舊又輕！

2006-03-08T02:11:00.000+08:00

旭高哈麻----遺傳基因-GP
噚日上car8亂碰一倫，點知揾到荀嘢，竟然有人放套全新未開封「水貨」Yokohama ES100---即係DNA-GP，仲要係我用開果種特別Size195/45/16，！對方開價$2200，我博一博留Message還價$1600，諗住對方都未必肯……哈！點知今朝佢竟然覆OK，於是放咗工即去睇貨！去到原來佢係車房嚟，個老細都幾老實，佢話係前排有個客訂咗，點知撻咗訂唔要，知道呢隻特別Size冇乜人要，唯有鑒平鑒濺賣咗佢執番D，就係咁益咗我，嘻……嘻……！我都幾detail咁去check，連張貼子都未撕走，開胎線同胎面嘅印字都仲有，再check吓胎肚都冇問題，製造日期係05年第9個星期，即係一年前左右，哈！得喎！於是就順利交易。呢個價位期實好底買，除番開每條$400，買15” ES100都唔得啦，更何况係特別Size！之前我問過胎舖，ES100 195/45/16要$750訂3個月，而家成套計平多過$1000！雖然係水貨，我又唔介意！
其實車胎响汽車嘅操控同安全均佔有好重要嘅地位，有時候撞與唔撞只係差一線，條胎咬嘅就停得切；唔咬嘅就Lock晒胎都係會撞！揸咗咁多年車，試過好多款胎—Toyo F-08, R1R, Vimode; BridgeStone RE711, S-02; Yokohama A520, ES100, AVS Sports, Dunlop W10, FM901, LM702; Goodyear LS2000, F1Eagle; Falken GRB TuneII; 有D印象幾深……R1R—如果當R胎用，炒梗；RE711—最咬係佢，大炒又係佢；FM901—果陣晚晚皮，4個月光頭；LM702&LS2000—靜到冇聲！Falken GRB TuneII—用咗3成後即變化石......可能大家會問我點解大部份都係次級少少嘅胎？我記得初初考到車牌乜都唔識，對胎冇乜要求，加上當時部100仔係老豆嘅，用乜嘢胎佢話事！跟住到手車熟咗開始學人揸快車，對胎有D要求，於是就揀咗套S-02，可惜Corolla車輕壓唔住，結果用唔盡套胎！後來「學壞咗」晚晚三五成群去皮車，於是落咗套RE711，果陣15”要$850一條，肉都尺埋！但係RE711真係幾咬，水地當冇到，亦由於信心大咗越踩越狼，結果我就大炒咗部AE110……亦因為果次大炒，我先識個死字點寫，結果收咗皮，而家人老咗，皮就唔好啦，都冇話隻隻彎響住劈，雖然偶然發吓顛，但係條底線set得好高囉！自然對胎嘅要求低咗，LM702, LS2000呢兩條相向低性能賣點寧靜嘅胎我都夠用啦，不過果陣用緊17”冇計，LS2000 size 205/40/17只係$500，真係底到爛；更何况ES100, GP-DNA, Vimode呢類比較高性能DD，價錢cheap cheap地，我直冇投訴啦！價錢比AD07, RE-01R平成$600-800一套，而家D油價咁貴，留番來入油好過！最後多謝阿Joe比地方我收藏住套「遺傳基因GP」！

2006-03-03T06:01:00.000+08:00

兩舊橙
噚日帶狗狗去覆診,响太平道見到架同我部車差唔多色嘅開縫Mini Cooper,咁啱佢後面有吉位,於是泊埋一齊,見到個情境咁得意,跟手順便影張相留念......

2006-02-24T02:06:00.000+08:00

相簿重生
之前响部Mac機度開咗個server放Gallery，唔知搞咗D乜搞到死咗，今個星期終於的起心肝搞番起佢，仲update咗做Gallery1.5.2，多咗D新功能咁啦。今日仲特登同我部車車影咗D相放入個Gallery度！不過天氣就唔多好，冇乜陽光搞到D相有D暗……而且我係好想影番D車車嘅動態相，即係部車行緊果D，但係要2部車加一齊行加一個乘客揸相機先影倒，之前都試過一次好好玩，遲D有機會再影過！其實我預咗一本Album比大家post吓閣下部車車嘅相片同大家分享一吓，多多支持，方法如下：
1) 在右面點選---我的相簿
2) 點選---上載區
3) 點選--- Add photo
*每張相最大size : 1024X768 或 300kb

2006-02-17T02:16:00.000+08:00

65 & 50
香港嘅交通法例，其實真係好落後，尤其係車速限制，更見嚴重，而家好多車2波過100km/hr已係等間嘅事(我果部唔得…….)，可惜全港道路最高限速只係110km/hr，而且仍有好多「小路」竟然仲係50km/hr，而果D警差叔叔往往就係响呢D「小路」設下陷井，唉！老實講2波未到4000轉都過晒啦……。大前排買咗部雷達探測，係美國牌子Beltrontics嘅RX65，發覺幾好用，定位機，大風筒都好早就叫，起碼5-6個車位，Laser搶都有叫過，估計係射緊前面部車嘅時候我都detect到，不過聽講比laser射中部機响果陣經中咗招……但係有個缺點係佢有好多Laser嘅誤嗚，有時响Highway都叫過不停，估計係Highway旁邊嘅手提電話發射天線干擾，有D煩。不過自從有咗部RX65之後揸車就越來越「勇」，比屋企人大力反對下，終於被迫割愛出讓……戲劇性地，不幸地，無奈地，不久地，我又中咗一張扣3分嘅閃光彈，即刻好後悔賣咗部RX65，前排又靜雞雞買番部Escort Passport X50，嘩！發覺佢比部RX65更好用！首先定位機，大風筒預响距離長咗，平均有8-9個車位，而最好係X50嘅Laser誤嗚係機乎等於0，唔會亂叫靜好多，的確係唔錯嘅選擇！

2006-02-17T01:01:00.000+08:00

蝦蘇
買咗4粒TRD stabilizer(蝦蘇)膠杯士，因為用咗幾年都夠期，TRD嘅膠杯士其實冇乜特別，唔係特別硬，只不過係TRD蝦蘇比原裝粗D，所以杯士中間個窿大D先啱裝，講開蝦蘇，AE110其實好失敗，原裝車係冇前蝦蘇，最惨係連前下搖臂都冇蝦蘇個Joint，要改就有2個方法，1)燒焊燒個Joint上去，人工平不過好易爆焊危險；2)更換AE111前下搖臂，一般連工包料(AE111前下搖臂+原裝蝦蘇)約$1500-2000左右，不過中古料要留意下搖臂膠杯士是否健全！另外記住千其唔好裝錯AE101下搖臂，因為係裝到在AE110之上，但係蝦蘇活動幾何係錯嘅，日久會變形或斷開，小心！蝦蘇有乜用？太複習我唔多講，豕過當你發現部車劈彎時好側，又或者出彎時有D左右「料」吓「料」吓」，裝咗蝦蘇你一定有驚喜！原裝避震效果更顯注，因為原裝避震行程長而且硬度低，蝦蘇作用力更大！

2006-02-09T21:43:00.000+08:00

有雷神，冇頭暈
近排部車有個怪現象，就係怠轉「間歇性」唔穩定，時快時慢……，後來先發現係當死火燈一閃嘅時候先出現，由於個防盜control關係，車門一開死火燈就會閃，但閃30秒左右佢就熄番，所以個怪現象就間歇性。我估可能係當死火燈發光嘅時候扯一扯低電壓，一熄燈又正常番，電壓唔穩定搞到怠轉唔穩定！於是買咗套Pivot Raizin電流穩壓器&地線套裝，點解買呢套？因為夠平，而且日本仔嘢有D信心！不過呢隻嘢有好多台仔Copy Cat，買嘅時候要小心，呢條link係日本Pivot官方網頁教你分真假http://www.the-pivot.co.jp/imitation/imitation-raizin-e.html ，大家買之前可以參考一吓！加咗之後怠轉唔穩定嘅問題雖然係仲有，但經已好輕微，達到可接受嘅程度！其他有D日本仔嘢好貴，Over $2500…真係唔捨得買，至於落鴨寮街自行執料DIY，其實係都可以，不過又要自己整餐懵，外觀又差DD！

2006-02-04T00:58:00.000+08:00

Bobby, I love You !!!!
Bobby成日打噴嚏，又流晒鼻水咁，今日終於要帶佢睇醫生，醫生話都冇乜嘢，食住D药觀察吓先，BB坐車好乖，從來冇周圍走，佢成日都好鐘意眼定定咁望住我揸車，今日突然即興同佢影張相，原來佢個樣老咗好多！其實BB已同我經歷咗15個年頭，我都當咗佢係我親細佬咁，細個時佢坐親車就周圍貢，馬安山未到西貢已經嘔到七彩，而家坐慣車我點劈佢都當冇到，雖然佢而家冇以前咁生猛，但係佢都好乖，有陣時成日掛住返工、玩車、上網……身邊好多重要嘅人與物都忽略咗！我應該抽多D時間陪佢，放佢落街行吓！今晚突然好感觸……

2006-02-03T06:34:00.000+08:00

Super Car Meeting @ 大年初一
唔記得同大家講恭喜發財！路路亨通！前幾日大年初一，一朝早就去咗鹿脛睇Super Car Meeting，一如以往又係D發仔波子泊埋一齊！我同阿Joe都唔執輸混在其中！我部110同阿Joe部Jazz加埋都冇10皮嘢，搞到有少少cheap咗嘅感覺，不過有部發仔360牌費過晒期仲cheap過我哋！

2006-02-03T05:54:00.000+08:00

Jazz強化計劃---Defi V.S.D. Concept
阿Joe之前係裝咗套Defi VSD Sports，而家屎忽痕又換套VSD Concept，字體大粒好多之餘轉數亦有刻度顯示，真係靚好多！最欣賞係佢有Auto Dim功能，Display隔離有個Dim sensor，有陽光曬住D字會發光D，响黑呢地方就會暗D！不過佢有好多其他功能要裝Defi錶先用得，例如油溫、水溫、Turbo Bar顯示及Warning功能，阿Joe，睇嚟你需要Defi錶多過我……快D買……hehehe……

2006-02-03T05:12:00.000+08:00

Jazz強化計劃---小喇「巴」
阿Joe終於姣婆守唔到寡，對佢部Jazz仔作出一連串嘅改裝工程，响九龍灣嘅Improve大洒金錢……先嚟有Cusco前後頂巴，再嚟Project mu0-500oC迫力皮，跟住重鎚Showa套裝式避震，出嚟嘅效果----正！正！正！本身Jazz仔嘅車架剛性俾我幾好嘅信心，而家落咗前後頂巴同避震之後，架車轉彎嘅敏銳性高咗好多！而且有一種好firm嘅感覺，極限高咗好多！最利害係套Showa避震low低咗部車之餘硬度好適中，絕對冇好震嘅感覺！Project mu迫力皮令制動效能提升，快車落Brake應得嚟好漸進，慢車泊車時有D「chok」，起初有D唔慣，而凍車時有D吱吱聲。至於套胎軨係唔係好熟口面呢？Enkie CP-02 15X7JJ 41mm offset + Yokohama ES100 195/55/15正係小弟以前果套，襯落Jazz仔度都唔錯！Joe哥，對佢哋好D呀唔該！

2006-01-29T02:03:00.000+08:00

203
噚晚返屋企，我又唔係趕時間，响Highway中線行住90-100k，當時鬼影都冇隻，突然有架B記E36推住我行，我都冇意同佢玩(因為根本冇得玩！)，我就打燈入慢線「避佢」(其實當時快線係冇車)，佢又跟我入慢線再推，幾秒後佢見我冇乜動靜又抽番中線，最刻人憎係佢騎住條虛線用超近距離咁打我一巴，真係佛都有火！我見佢尾牌係323i，玩Highway我都好冇so，但佢實在太串，於是我拍落4波追，同佢嘅距離有3個車位，佢响快線，我响中線，上埋6波一路上到180k，5200轉，我見油溫係95oC左右仲可以上，地台油踩吓放吓，上到203k5800轉都係keep住有3個車位距離，我估佢都係吊吓吊吓個油門同我玩，於是我就收油冇踩，因為我知道點踩都追唔到佢，始終大cc大馬力响Highway著數好多！假設大家嘅極速都係220k，佢323i由180k-220k可能只係10秒，但我部AE110肯定要30秒，呢一點都夠輸啦！不過上到200k大關我都好滿意，如果6波6300轉，唔知有冇220k呢？？？

2006-01-29T00:29:00.000+08:00

GT錶板
同好多玩AE110嘅朋友傾開計，佢哋都好想裝番個AE111GT錶板，GT錶板特別在有蜂巢底及紅色刻度！但係唔講唔知，GT錶板並唔可以直接裝上AE110度嘅原因係AE110嘅速度錶(km/hr)係機械式，由波箱嘅齒輪轉動「咪錶鏈」再轉動咪錶線圈產生電流而顯示速度；而AE111GT嘅速度錶(km/hr)係電子式，由波箱嘅Speed sensor產生訊號再由電線傳到咪錶而顯示速度（大家可以睇吓個GT錶板背後係冇咪錶鏈個插頭）。改裝方法有2種，較為全面就係改Speed sensor & 改咪錶龍，較為煩複同昂貴但勝在徹底；另一方法係將速度錶(km/hr)面板連指針交換，不過支指針好難拆出嚟，好多人拆完之後速度錶會唔準及壞咗……

2006-01-26T10:21:00.000+08:00

台仔Defi---ADI
之前用嘅Autogauge 52mm油溫、水溫&油壓錶其實都唔錯，不過指針行程只有90度好似唔係咁靚，幾個月之前响Yahoo拍賣用$600 bid咗套全新ADI油溫、水溫錶番來，都算幾底！出面舖頭賣緊$450一隻。介紹吓呢隻ADI先，(Andrew Design INC.)來自台灣科技，聲稱採用日本Defi生產嘅sensor，日本生產嘅Stepping Motor錶蕊，精確度甚高！特別功能有：Peak Hol最高數值記憶、溫度過高Bi..Bi聲及LED閃燈警告及啟動自我檢測功能，即係一著車指針會270度來回行一次！除咗冇Replay功能之外，同Defi冇大分別，咁當然冇Defi咁靚啦！但係ADI嘅好處係唔洗裝Control Unit，而且售價比Defi平一大截，最重要係Defi好野鬼......怕俾人偷！

2006-01-25T16:50:00.000+08:00

防止追突燈
條FGK話就話不鏽銹鋼造，不過响車底乜屎水都有，仲要D死氣好熱，乜嘢鋼都死，間中用D省銅水摔吓條喉，條喉冇咁易殘，當然只係尾鼓啦！而且摔令D，如果後面有車用燈射你，佢反而比自己D燈光反射自作自受添，間接做咗車尾防止追突燈！快哉！

2006-01-25T16:33:00.000+08:00

KOBA
舊Goldstar電池終於打咗柴，剛好2歲1個月，都算合理！不過就搞到我「呢咁hair」.......好彩停車場有位Echo車主幫我撘番著部車，真係唔該晒，出咗車去到荃灣途中，行住車60km/hr一踩極力子，熄車，再著，仆街！都係冇電著！即係舊電池义唔入打咗柴，好彩即刻放番極力子chok著部車又行番，誤打誤撞去咗享和街一間胎鋪換電，我今次指定要40A電，因為size細D唔會頂住條Super Intake，其次輕DD......，其實AE110新車落地都係用40A細電池，不過後期加咗Amp40A未必夠，今次試吓用啦！呢舊電又幾好款吖！韓仔造KOBA環保電，黑色一舊有個紅色手環，$280好底用！上面有個indicator.....不過我之前用過一舊AC Delco環保電，用咗大半年就死亡，但係個indicator都仍然係綠色.....希望呢舊好D啦！

2005-12-12T14:44:00.000+08:00

吹雞
唔理你係乜人，唔理你揸乜車又或者冇車，都歡迎你來聚一聚！
BBQ版聚：17/12/05
日期：17/12/05 (Sat)
時間：18:30 (集合) ~ 19:00(出發)
集合地點：黃金海岸錶位停車場
BBQ地點：龍古灘

2005-12-06T05:44:00.000+08:00

9.29
响冇乘客冇電油嘅情況下0-100km/hr做到9.29sec，如果執走埋D低音箱&Spare胎，我諗最盡係9秒......
其中一個4秒幾係70-100km/hr加速時間！

2005-12-06T01:34:00.000+08:00

救電
舊電池用咗2年，經過咗幾次失魂嘅完全放電，似乎宣佈死亡，即本試吓再差埋呢次，睇吓可唔可以起死回生......

2005-11-29T01:32:00.000+08:00

老嘢！漏嘢！
想唔認老都唔得，8年車齡，D嘢真係開始到期，上次tune SAFC嘅時候，要積起部車裝sensor响中喉度，先發現到個風油軚漏油好嚴重，其實之前都知有漏，不過估唔到咁犀利......今日去咗車房，醫生話係軚尺漏油，要留院維修.....

2005-11-24T18:11:00.000+08:00

Tunning Apexi SAFC
响年中裝咗個SAFC，噚晚終於去tune番佢，點解拖咗幾個月先搞？係因為要搞好晒D東菇風隔、Intake、儲風Pipe.......仲要等埋換偈油、火咀......等等！其實呢類型嘅產品响好多年前已經有，以前我都有部Field HyperR SAFC，果陣坊間嘅改車技術冇咁「完善」，往往都係靠「人肉馬力機」去tune，效果都係有D「人云亦云」，tune車師傅搞完一輪話爽嘅，自己心理作用「又好似係」，始終冇乜實質數據去支持！

SAFC嘅工作原理其實唔算太深，簡單來講，佢係空氣計流(Air Flow Sensor)及行車電腦(ECU)之間嘅一個「騙子」(AE車系用嘅係Vacuum Pressure Sensor)，SAFC會「改變」Sensor得來嘅數據再傳輸到ECU，令ECU有異於正常去指揮供油系統運作，即係改變咗引擎嘅供油量。而整個工序最重要係注意引擎嘅空燃比(Air/Fuel Ratio)，空燃比較濃無疑係可以保護引擎，但亦會有俗稱「燒唔晒」嘅現象，引擎只會大食兼冇力；反之空燃比較稀則會有俗稱「唔夠油食」嘅現象，引擎表現可能好爽，但太極端亦會令燃燒室溫度上升，產生爆震(Knocking)，對引擎損害之餘亦會令馬力流失！

另一方面，大家必要清楚，即使係同樣型號嘅引擎，基於損耗程度、改裝程度、駕駛習慣......等有所唔同，大家嘅SAFC設定亦唔會相同！所以唔好問我嘅setting係點樣(我用緊東菇、7度火咀，抄咗我一定唔會啱你！！)，對於呢種精細嘅工序，儀器、工具、技術同經驗都係缺一不可！响朋友介紹之下，認識到一間名為--ECU Works嘅公司，佢哋採用咗Lambda sensor接駁到行車電腦及手提電腦，經過多次實地試車來記錄行車數據如：轉數、空燃比、油門角度.....等等，然後技師會因應不同因素同埋我嘅駕駛需要去Fine Tune部SAFC，而最令我佩服嘅係，佢哋竟然有HKS Knocking Monitor，全程用HeadPhone監聽住引擎有冇Knocking嘅情況，呢方面我係覺得佢哋係專業嘅！！Tuning嘅詳細原理、分析我就「唔拋書包」，因為太深入嘅我就真係唔識！

大家又可能我响度幫人賣廣告，講就天下無敵，我就好鐘意用數據比較，同樣今次我用0-100km/hr時間去比較：
Tune SAFC前
輪胎：195/55/15
入風：Tom's原裝位海綿風隔
車重：只有司機一名，冇Subwoofer，冇後備胎，冇什物，電油缸少於1/10 (啱啱番噴完乜都未裝番上車
0-100km/hr:10.02sec

Tune SAFC後
輪胎：195/45/16
入風：HKS東菇，仿Tom's Super Intake，仿ARC儲風Pipe
車重：司機一名，160磅乘客一名，有Subwoofer，有後備胎，全車什物，電油缸多於4/5(Caltex入$500油送牙膏，所以打爆缸)
0-100km/hr:9.89sec

基本上間「好似」唔差大遠，tune咗之後只快咗0.2sec，但大家睇咗試車條件就會明白.......好多人都話東菇、車重都會破壞頭段，我好認同！等我遲吓執走晒D什物再試，唔知會快幾多？Keep住Update我個Blog啦！hahahahaaaaaa ！！

ECU Works
聯絡電話：8106 9939
電郵：info@ecuworks.com
地址：九龍油塘草園街4號華順工業大廈地下c室

2005-11-24T08:38:00.000+08:00

換火腿
換咗「火腿啦」！用咗Toyota OEM Denso SK20R11 銥金钃火咀，其實佢係7度系列，未必太過適用於5AFE引擎，但係反轉全世界都冇6度銥金钃火咀，唯有用住先，加上呢隻Toyota OEM Denso比其他同類銥金钃火咀平咗一截.......

2005-11-16T00:35:00.000+08:00

大雞狂食細米
點改都冇用，NA車就係NA車，Turbo車就係Turbo車，性能唔同，潛力唔同，已經有十幾歲嘅S13，不費催灰之力已經將我部110....................

2005-11-16T00:19:00.000+08:00

棍頭
個波棍頭花晒好肉酸，買過個好貴唔捨得......於是用沙紙省吓佢又OK喎！再用噴沙處理，而家係磨沙款，雖然有D怪，但係可以接受！波棍頭呢樣嘢其實都幾緊要，可能由於初初考到牌嘅時候就揸AT車嘅關係，到換咗MT車後就鐘意D棍狀嘅波棍頭，後來發覺成日跣手，於是用番波狀嘅波棍頭，你又鍾意用乜款呢？

2005-11-11T22:25:00.000+08:00

銻
玩開Corolla AE系嘅朋友都知道，其原廠水箱嘅壽命並唔耐用，尤其當用上Racing 1.3bar嘅水箱蓋，更會令冷卻液壓力提高而加速水箱死亡。由於原廠水箱頂部及底部都係用膠造，往往就係响呢D地方爆裂，輕則只是少少滲漏出嚟，發現得早更換水箱還可以；但嚴重嘅响行駛途中谷爆，引擎分分鐘報銷！！購買水箱我哋有好多選擇，劏房二手料，$200左右，不過質素好參差，萬一揀咗個就嚟裂嘅，仲死！全新台仔料約$650，其實係一個唔錯嘅選擇，不過亦聽聞台仔水箱用料差勁，即使用咗防銹嘅冷卻液，唔夠一年內部都係生晒銹(只是聽聞)；全新正廠件約$2500,底唔底買見仁見智！！改裝零件方面，倒有一個幾好選擇---日本水箱界老牌子Koyo！無論响造工或用料上都唔需要懷疑，全銻合金造，以高精度機器點焊，無論散熱效能、剛性、耐用性及重量等各方面，都遠勝台仔料及正廠料！！而售價方面只係$2400，真係好底買！可以於錦龍汽車零件公司查詢，亦備有其他車種選擇(好廣告喎！)！值得一提係有2點：1)同型號車系，MT/AT水箱係有分別(係人都知)。2)Koyo銻水箱係對應全線由AE92-111嘅車種，而佢係用大種水箱蓋，即係AE92果隻，而AE100-111車種嘅原裝水箱蓋並唔合用，故此AE100-111車主在購買Koyo銻水箱同時，亦要去買一個AE92嘅大種水箱蓋！！另外，想再進一步加强散熱效能，TRD出品嘅低温水膽可以幫到你，水膽提前於70oC開啓，可以讓冷卻液提早進入引擎散熱，TRD水箱蓋&水膽，可於Tom's & TRD Shop購買，合計約$550！多謝屎祖君送咗個水箱蓋比我，爭你一餐海南雞飯！！
千其唔好問我裝咗銻水箱&低温水膽部車快咗幾多，因為佢哋嘅主要作係維持引擎嘅耐力，有冇試過响夏天好熱嘅時候，啱啱出車時部車好爽，但係keep住行一陣部車就冇咁好力？如果有就快D搞搞佢啦！
錦龍汽車零件公司
27563686
Tom's & TRD Shop
旺角山東街82號地下
27830993

2005-11-11T11:19:00.000+08:00

超級進氣系統
玩咗Corolla咁耐，响性能上一直都追求頭段加速力，保留住原裝位進氣風盒及原裝排氣催化，無非都係想keep住5AFE引擎嘅優良扭力表現，配合咗一D週邊改裝如：Tom's高流海綿風隔、TRD火咀線、FGK Legalis R中至尾排氣喉，AE111六前速密比波箱、TRD極力子及偷輕原裝飛輪等等......0-100km/hr最快成績係9.77秒(以195/55/15呔計算)，比起好多其他車系，呢個成績雖然並不突出，但以5AFE引擎來講經巳係唔錯，不過中尾段嘅表現卻唔係太理想，5000RPM後加速好似頂住頂住咁，有見及此想响進氣系統造D功夫。東菇型嘅高流海綿風隔無疑係會破壞引擎嘅低轉扭力，但係如果改裝得宜，低轉扭力同高轉馬力係可以兼顧！！採用HKS Super Mega Flow大東菇海綿風隔，配合仿Tom's Super Air Intake及仿ARC儲風Pipe，得出來嘅化學作用非常理想，在未改裝超級進氣系統前馬力約132PS，改裝後得出145PS，當然，RSM嘅馬力測試結果唔可以作準，只供參考！！以下係每件零件嘅詳細介紹---
HKS Super Mega Flow大東菇海綿風隔---我响Yahoo拍賣網bid嘅，二手8成新$150，但係跟嚟塊海綿好殘要換(Yahoo拍賣網bid全新$100)，東菇尺碼為200-70mm(即俗稱大東菇細喉咀)，東菇外徑為200mm，喉咀內徑為70mm，其他size係唔啱裝嘅！試過齋用東菇行車，頭段係......
仿Tom's Super Air Intake---呢件係日本Tom's專為AE系Corolla設計嘅東菇導風器，用纖維製造，但此產品在早年前己停產，幸好元朗零壹包圍公司有仿製品，價$600，新品係灰白色要DIY噴油，呢個Inake嘅賣點係佢啱啱好fit晒個HKS大東菇，能夠隔住引擎嘅熱空氣，前面有2個進氣口，一個位於左頭燈後直接撞生風，另一個呈三角型fit入原裝生風喉吸風，當然原裝生風喉已改位由Bumper底入風啦！
仿ARC儲風Pipe---於牛頭角領賢有限公司買，價$250，全不銹鋼造亦附有原裝sensor窿位，儲風Pipe嘅用處係代替咗原裝位風盒，當縮油時能夠儲存一鼓空氣响入面，當番腳油門一開，大量嘅空氣就可以即時送進引擎內，係保持扭力嘅一件極有用東西！點解唔買堅料ARC？ over $1500你捨得買嗎？？我就......
Wilson Performance矽膠喉----用來接駁蝴蝶瓣、儲風Pipe及東菇，需要2個，蝴蝶瓣至儲風Pipe用大變細76mm>56mm，儲風Pipe至東菇用直身76mm，於火炭威迅汽車工程有限公司，價約$300全部2件，買埋D不銹鋼喉碼，$10一個共4個，比起五金鋪果D靚好多同實淨好多！。雖然係土炮造，但矽膠喉內有線層，跟足日本大廠規格，質素唔錯！！當然可另選用名牌Samco，但價錢......
零壹汽車用品公司
元郎鳳攸街22號G好順意大廈二座地下
24782479
領賢有限公司 Kingsmart Ltd.
九龍牛頭角定富街59號地下
2796 1765
威迅汽車工程有限公司
火炭桂地街10-14號華麗工業大廈地下1A-1B
2687 5781

2005-11-10T18:42:00.000+08:00

195/45/16
又講吓套呔，跟軨套呔巳經光頭光到見帆布，迫住要即換，我就特登揀咗一隻特別size嘅呔----195/45/16！！由於AE110嘅標準15"呔size為195/50/15(呔圓週為1809.6mm)，如果用上一般205/45/16呔(呔圓週為1856.4mm)，外徑及闊度都大咗，好直接影嚮咗加速表現，尤其對於AE110呢類細cc嘅車。而家用咗195/45/16(呔圓週為1828.1mm)，圓週差距不足1%，而且闊度亦同是195，所以性能同15"呔可以話係分別不大，不過呢隻特別size嘅呔可以楝嘅model好少，而且貨源有限，經過朋友介紹下，終於揾到一個唔錯嘅選擇----Toyo Trampio Vimode！！級數上可能未及上BS RE-01 或 Yoko AD07，經測試後抓地性卻很好，與之前用果套Yoko AVS Sport差不多，回頭性及靈敏度亦相當好，而路噪方面亦控制得好好，濕地性能尚未測試；另外，45偏平率呔壁更薄更斜令條軨看似更大嘅17"，但係太斜卻影嚮咗呔壁剛性，刻意掟入急彎時有「跪一跪」嘅動作，情況尚可接受.......總括來講好滿意！

2005-11-10T18:32:00.000+08:00

極之舊款嘅軨
終於比我揾到一套極之舊款嘅Yokohama Advan TC 一代，尺吋為16"X 7JJ offset 35mm ，根據官方資料其淨重為7.56kg，大家可能會覺得呢隻款唔靚，其實佢中間係有隻「碟」遮住D縲絲 & 一粒「大絲母」收住隻碟，不過我覺得裝咗仲核凸！！！咁點解我會揀呢隻軨？主要原因係佢16"只係7.56kg已經好輕！其次係7JJ offset 35mm係完全fit晒AE110嘅setting，好多台仔軨都係42-45mm唔太適合；加上佢made in japan質素上有信心保証；而最後呢隻「橙金」色嘅車身色，始終金色軨會襯DD，其次我就鐘意電鍍款，之前白色RP01太Sharp，搶晒眼！

2005-10-27T01:45:00.000+08:00

Offset 45mm 好肉酸
「軨」--對於整部車嘅注目度擔當好重要嘅地位，之前用嘅一套Enkei CP-02 15"X7JJ offset 41mm雖然係好舊款，但係論重量絕不比現時流行嘅鍛造軨重，不過最大嘅弊處係佢個樣好似細咗個碼，，可能佢D「抓」唔夠出，搞到15"看似14"咁樣。另外碳灰色實在同隻「粉橙」色格格不入，似乎深色軨並唔係一個好好嘅選擇，把心一橫換咗佢，不過新軨太貴唔捨得買，而家D鍛造軨閒閒地$1200起一條，有D重over$2000，連埋胎要成皮嘢埋單，你都咪話唔肉痛，台仔抄款軨我又唔想用，OZ變GZ，SSR變SSP......好肉酸，唯有向二手軨進發，揾到套白色 Enkei RP01 16"X7JJ offset 45mm軨連205/50/16 Falken ST115胎，$2000好抵玩，胎有95%新但50胎太厚唔啱size，而軨7JJ offset 45mm亦係錯嘅，尾軨直頭好似向內縮咗入去，好鬼肉酸，加上白色軨太Sharp太搶眼，同車身色撞到飛起，結果玩唔夠2日就賣番出去，想知我換乜軨，keep住update 我個blog啦！！

2005-10-10T01:32:00.000+08:00

一體化!!
RSM或者SAFC呢類電子改裝零件係正，但係要揾個地方安置係有D困難，呢個2Din頂置中控台，原意係安裝大面版用，而家呢個DIY改裝，除咗收埋3隻52mm儀錶外，重可以收埋RSM，令所有電子改裝零件更一體化！

2005-10-10T00:46:00.000+08:00

出山啦！
介紹吓呢隻係乜嘢色先......取自2005年Honda Jazz FaceLifted 新款色系，編號為YR551M，顏色正名為Veuns Orange Metallic(金星金钃橙)，色普係原自橙色。以Honda Jazz嚟講，呢隻色好少人揀，可能未必人人接受得到，我就係貪佢夠特別少有，如果人地問我呢隻係乜色，我嘅答案係「粉橙色」，你或者會問，點解唔楝「掃把佬藍」、「生銹橙」、「海豚灰」、「GTR紫」或「M3介棘黃」......？？？我只覺得，太多人揀咗，周街都係，噴到俗晒！而且我部只係Corolla，部車襯唔起太棘嘅色！！暫時見過嘅人唔多，Comment好壞參半，有人話太姣，有人話太斯文，有人話太Sharp；亦有人話好靚，好Match.....你話呢？2005年啦！開放少少，唔好再係紅、藍、白、銀、灰......呢D咁「行貨」、咁「悶」嘅顏色啦！呢D色Corolla原廠都有，我不如買過架車啦！哈.....！而家最大問題係套15" Enkie 十字鈴極唔襯部車......要搞搞佢........

2005-09-13T07:36:00.000+08:00

呢兩日突然想玩番GT4，贏咗部65年Alfa 1600 GTA，落咗Stage2 Turbo之後加埋ECU都係26X匹，但佢嘅handling真係好過癮，我只係用Sport避震，D彎好Sharp，彎心中盡油份尾會西出去，一踩一縮都好容易就控制到Drift嘅動作..........呢D係其次，其實我最鍾意佢嘅outlook，Classic得嚟亦好硬朗，正！65年都有咁嘅作品，好嘢！

2005-09-12T21:43:00.000+08:00

17"呔軨真係好睇D，不過AE110要用205/40/17呔，特別size，可以選擇嘅呔好少，而且就算用D香雞呔都over$600，最大問題係由於呔壁太薄，好容易劏呔，我就係試過半年內劏過2條呔，好邪~~~！所以後來換番15"呔軨囉！始終好似差DD......

2005-09-03T02:43:00.000+08:00

之前用PhotoShop搞嘅，我唔係高手，所以執得好屎，白色果張係原相，你估我轉邊隻色？答案係.......第5張

2005-09-03T02:15:00.000+08:00

進度係零，車尾大銀幕電度邊，司機位門電度邊訂貨3個weeks.....師父話司機位門電度邊一定要裝?先可以出車，否則入晒水！！怪在我訂溜o野..... 等...................！

2005-09-03T00:59:00.000+08:00

今日同個Jazz朋友去咗元朗'X-car shop'改1715Brake kit，由於全程睇住佢裝，手工都算OK，用全新DTM碟&皮，翻新1715胞魚，撘條橋，連人工total$2800，值得一提係佢套翻新胞魚連D塵冚都好新(唔sure係咪全新)！而全部套kit都係bolt on，算係方便可靠，嘩！胞魚把遮，隻碟&皮嘅size比原裝大好多！至於Brake performance方面我就冇份試，但可以話比大家知，我坐客位由元朗出觀塘，我一落車就嘔.....係真係嘔咗D lunch出嚟....你話堅唔堅！

2005-09-02T02:06:00.000+08:00

黑晒！新黑燈，黑車章，黑色RSM已準備好，開始有D心急想攞車！不過部車仲未有消息！今日去咗運輸署搞轉色，點知原來要攞行車証去搞，我仲以為帶身份証&牌簿就OK........%$&^#$@#!$^%^$........白行一趟，都好，咁樣又有個籍口聽日去探仔仔！Good !!!

2005-09-02T01:46:00.000+08:00

其實一直都有咁嘅構思，不過話晒係「高科技電子零件」，一直都唔敢拆開噴。日前响某newsgroup見到一位網友做咗寫咗D心得，於是跟佢一樣咁做，得咗！！(Thanks to 狠皮兄！)想噴埋個掣，但驚按得多會甩色......所以冇噴。佢塊底板寫住'Made in Japan FUTABA Corp'，唔知係唔係同細個玩遙控車果間公司有關呢？其實黑色，靚嗎？

2005-08-30T01:26:00.000+08:00

一直都好想整一個賽車場景，個Show Case响宜家傢俬買咗成年，不過一直忙到死唔得閒砌，趁呢排得閒DD，的起心肝整！起初諗住整個Rally場景，但後來發覺唔係易......都唔知點整條泥路出嚟。有一日响屯門市中心個玩具部見到2部Tomica造嘅Honda NSX JGTC賽車，手工精美，而且只係$45一部，於是買番2部先。開頭諗住整條彎路刺激D，但係又諗唔倒用乜嚟整條紅白間，唯有單調D整彎前100M直路。條直嘅紅白間用乜整？？哈哈......就係用人地「穿魚骨Notes」果條魚骨，剪晒D「橫骨」出嚟，再响條主骨上面間格咁噴上紅色，That is !!!叻嘛？跑道係用4000號幼沙紙，草皮係用文具舖買到嘅絨面紙.....全部夾埋唔洗$150！大家得閒砌番個！講番呢場賽事先，8號車响外檔想射線入彎，但100號車想响內線攝位，邊個夠膽late brake入彎而唔炒，邊個就贏.........！

2005-08-29T13:31:00.000+08:00

呢部又點？隻色好Sharp！其實有陣時諗，車齡高唔緊要，如果車主錫車keep得好，根本唔係問題！改得好的話，舊車種一樣俾到人驚喜！！